HAGAI
Iyano lya busosu bwa kobaka.
1
1 Mu busi butangi bwa mwezi wa mutuba ku mwaka w'ibili a wa mukota Dario, iyuki lya Yehowa lyavule ku mulengania Hagai buno alitende ku Zerubabeli b mwana wa Saltieli mwangati wa Yuda nu ku Yosua, mwana wa Yosadaki, sankoga munene: 2 Yehowa, Mwiya Mayombo atenda bunee: “Bantu babano bakutenda bunee: ‘Nkungu tazika za kobaka numba za Yehowa.’” 3 Nkungu zezo iyuki lya Yehowa lyabaside mulengania Hagai kutenda bunee: 4 “Ndi zili nkungu za kusigala mu numba zeinyu zatoza, nu numba zeno zasambuka?” 5 Nu Yehowa, Mwiya Mayombo, abwide lingo bunee: “Kano kaluma kengelazi mu mitima nzila zeinyu. 6 Mwayikile mbuto ningi, tondo mwatubwide nkeke; mwalide, tondo tamwembukile; mwanune, tondo mpusia tazakalikile; mwavwalile nsulu, tondo tamungule muzuzo; mukiti akatile lukalilo, tondo alubika mu nsago zili na matengu.”
7 Yehowa, Mwiya Mayombo atendile bunee: “Kengelazi mu mitima nzila zeinyu.” 8 Yehowa atendile lingo bunee: “Bakamazi miduko muvwe na miti nu kobaka numba zane, buno natananizibwe muzo nu naganunwe muzo. 9 Mwatundile byingi, tondo byabezaga bikeke; nu gamwavule nabyo nabibalanganizie na lumpumpu.” Yehowa, Mwiya Mayombo akubuzia bunee: “Ku buni? Kubuno numba zane zasigala zasambuka, tondo mwasasizie lubilo nawe nawe ku numba zage wenyene. 10 Ku kabamba keinyu mbula tazikuloka, nu kisi takikwasa biyikanwa. 11 Namanine buno mbula tazikuloka gansi, aba ta ga masoa, aba ta ga miduko, aba ta ga ngano, aba ta ga miti za maku aba za makiti aba ga binsania bikwasa mu kisi, aba ta ga bantu nu bituganwa aba ta ga milimo insania za maboko.”
12 Nkungu zezo Zerubabeli, mwana wa Saltieli, nu Yosua, mwana wa Yosadaki sankoga munene, gamozi na bansania basigede ba bantu ba Kalaga banzile iyuki lya Yehowa, Kalaga wabo, nu moki ma mulengania Hagai, kubuno Yehowa, Kalaga wabo, amusingile munkatini mwabo. Nu bantu bakule Yehowa boba. 13 Nu Hagai, mulengania wa Yehowa, abasambalide musagu wono wa Yehowa: “Nili gamozi n'inyu, u bukutenda Yehowa.” 14 Yehowa ayukizie mutima wa Zerubabeli, mwana wa Saltieli, mwangati wa Yuda, nu mutima wa Yosua, mwana wa Yosadaki sankoga munene, nu mitima za bantu bansania ba Kalaga basigede. Bavule nu kulinga mulimo mu numba za Yehowa, Mwiya Mayombo, Kalaga wabo, 15 ku kindi kya makumi mabili nu binazi kya mwezi wa mutuba wa mwaka w'ibili c wa mukota Dario.