ZEKARIA
1
1 Ku mwezi wa kinana wa mwaka w'ibili a wa kwangata kwa Dario, iyuki lya Yehowa lyabasile ku mulengania Zekaria mwana wa Berekia, mwana wa Ido, lyatendile bunee: 2 “Yehowa ongedwe nunse basoinyuwe. 3 Ku kabamba kakano tenda bantu bunee: ‘Yehowa, Mwiya Mayombo atenda bunee: “Subyazi kundi, nu Nne nasubye kumuli,” u bwatenda Yehowa, Mwiya Mayombo. 4 Tamube na misako anga basoinyuwe, basambalidwe na balengania. Yehowa, Mwiya Mayombo atenda bunee: “galukyazi misako zeinyu mibi nu tukazi mu nzila zeinyu mbi. Tondo tabazigile kunnungwilila aba kutega matuzi mabo kundi, u bwatenda Yehowa, Mwiya Mayombo.”
5 Kano kaluma basoinyuwe beli kuni? Nu balengania, ndi bakulama ku milyalya? 6 Tondo bitondo byane nu milembe zane zinakakizizie bakiti bane balengania, ndi tabyabaside basoinyuwe? Nu bagalukile nu kutenda bunee: “Yehowa, Mwiya Mayombo atukitide bulingilingi na nzila zeitu, nu makitilo meitu matunganenne kusungibwa, nu anga bwasombwede kutukitila.”’”
7 Mu kindi kya makumi mabili nu binazi kya mwezi w'ikumi nu umozi,b u mwezi ukumanwa Shebati, wa mwaka w'ibili wa kwangata kwa Dario, iyuki lya Yehowa lyabaside mulengania Zekaria, mwana wa Berekia, mwana wa Ido.
8 Namonine ku kalolesio mu kindi: kwabezaga lwabusio lwane muntu eikala gantata ga farasi zakisimana; zemenne munkatini mwa miti mu mpinga, nu kumbusa kwa zezo farasi kwabezaga farasi zakisimana nu zatondoka nu zenga. 9 Nabuzizie bunee: “Mukota wane, buni bwa zeno farasi?”
Nu mwanzelo wantendaga ambwide bunee: “Nakulolesie buni buzili.”
10 Nu muntu wabezaga wemana munkatini mwa miti akwide bunee: “Zeno u zasingilwe na Yehowa kwenda kunsania mu kisi.”
11 Bakwide mwanzelo wa Yehowa wabezaga wemana munkatini mwa miti; batendile bunee: “Twendile mu kisi, nu twamonine buno kisi kinsania kyabezaga kibibi nu na bubobelelo.”
12 Nu mwanzelo wa Yehowa akwide bunee: “Ee Yehowa, Mwiya Mayombo, nkungu nkizi ziwakwile Yerusalema kyombo, nu miino za Yuda ziwongedwe myaka zezo makumi mutubakamo?” 13 Ububo Yehowa akwide mwanzelo watendaga nage bitondo bisoga, nu bitondo bya kubibya.
14 Mwanzelo wantendaga ambwide bunee: “Sambala kitondo kikino: Bubuno u bwatenda Yehowa, Mwiya Mayombo: ‘Nili na lugi lunene ku Yerusalema nu ku Sayuni. 15 Tondo nongedwe nunse bilongo bikukengela bili mu bubobelelo. Nongilwe kakeke tugu, tondo batalikide mbabazio.’
16 Ku kabamba kakano Yehowa atenda bunee: ‘Nakwile lingo Yerusalema kyombo; nu gago numba zane zobakwe, nu muzigi walindikwe mu Yerusalema. Bubo u bwatenda Yehowa, Mwiya Mayombo.’ 17 Sambala lingo buno Yehowa, Mwiya Mayombo, atenda bunee: ‘Miino zane ziyale lingo na busoga nunse, nu Yehowa abibye lingo Sayuni, nu asombole lingo Yerusalema.’”
18 Nalambwide meiso mane, nu lwabusio lwane namonine ku mega manazi. 19 Nabuzizie mwanzelo watendaga na nne bunee: “Bikizi bibino?”
Anakwide bunee: “Mamano meli mega mabalanganizie Yuda, nu Israeli nu Yerusalema.”
Atendile bunee: “Mamano meli mega mabalanganizie baYuda aba takwabede lingo muntu wazanzula itoe, tondo babano bakuvwa kumeitia boba, nu kugusia mega ma bilongo byazanzwide mega mabyo ku kisi kya Yuda nu kukibalangania.”