Mwiya muzigi wa kulindika.
2
1 Nalambwide meiso, nu lwabusio lwane namonine ku muntu na muzigi wa kulindika mu maboko mage. 2 Nu Namubuzizie bunee: “Kuni kuukwenda?” Anakwide bunee: “Ku Yerusalema, kulindika bulazi nu bungulu bwago.”
3 Nu mwanzelo watendaga na nne atukile; nu ungo mwanzelo avule kukulumana nage, 4 nu amutendile bunee: “Itume lubilo utende wozo musikila, buno Yerusalema wabe mwino uteli na mikolo, ku kabamba ka bwingi bwa bantu nu bituganwa byago. 5 Nu Yehowa atenda bunee: ‘Nnenyene nagutimbe anga mukolo wa keiya, nu nabe mugo lutanuno lwago.’”
6 Yehowa atenda bunee: “Vwazi! Vwazi! Tinazi bulazi kutuka kisi kya ku lulenge lwa kwikazi, ku buno namubalanganizie mu ntungo inazi za kwigulu. 7 Iyoniazi, inyuwe bakwikala gamozi na mukinga wa Babeli!”
8 Kubuno Yehowa, Mwiya Mayombo, wansingile mu lutanuno lwage ku baBilongo bamusungizie, atenda bunee: “Wozo witubya kumuli, nti eitubya ku kamoni ka liso lyane. 9 Nazanzule kuboko kwane ku baBilongo, buno bakobe babyo babanyage. Nkungu zezo mwamenye buno Yehowa, Mwiya Mayombo, u wansingile.”
10 “Mukinga wa Sayuni, imba na mbogimbogi, kubuno navwa nu nikale munkatini mwobe,” u bwatenda Yehowa. 11 “Nu baBilongo beingi bagomie na Yehowa mu busi bubo. Nu babe bantu bane, nu nne nikale munkatini mwobe, nu uwe wamenye buno Yehowa, Mwiya Mayombo ansingile kuguli. 12 Nu Yehowa apiene baYuda anga kibe kyage mu kisi kyasililila, nu asombole lingo Yerusalema. 13 Bantu bansania, ikalazi kibibi lwabusio lwa Yehowa, kubuno azanzuka mu kiziki kyage kyasililila.”