Nsulu zenga za sankoga munene
3
1 Andolesizie Yosua, sankoga munene, emanine lwabusio lwa mwanzelo wa Yehowa; nu Satana emanine ku kuboko kwa seidume kumusongela. 2 Yehowa abwide Satana bunee: “Yehowa akuzugile, Satana! Yehowa wasombwede Yerusalema akuzugile! Wono muntu, ndi nteli anga kamekemeke katikizibwe mu keiya?” 3 Nu Yosua avwalikizibwe nsulu zili nsese nunse gemanine lwabusio lwa mwanzelo. 4 Nu mwanzelo akwide babo babezaga bemana lwabusio lwage bunee, “Tikyazi nsulu zage zili nsese.” Nu abwide Yosua bunee: “Lola, natikya bwagi bwobe, nu nakuvwalikye nsulu nto za bukunza bunene.”
5 Nu natendile bunee: “Bamubike nkumbu zenga nunse ku itoe lyage.” Ububo babikile nkumbu zenga nunse ku itoe lyage, nu bamuvwalikizie nsulu gemanine mwanzelo wa Yehowa bwigi.
6 Mwanzelo wa Yehowa atendile Yosua bunee: 7 “Bubuno u bwatendaga Yehowa, Mwiya Mayombo, bunee: ‘Ndi ukwenda mu nzila zane, nu kulanga makakizio mane, nti wangate numba zane lingo nu kulanga milungu za numba zane, nu Nne nakukase kiziki munkatini mwa babo bakwemana gano.’ 8 Ee Yosua, uwe sankoga munene, uwe nu banyobe beikala lwabusio lwobe, beli tulolesio twa bitondo bikuvwa, ungwililazi, Nne nalusie mukiti wane wamanwe Lutabi. 9 Lola ikozi linabikile lwabusio lwa Yosua, gantata ga lilyo limozi geli meiso mutubakamo. Nasanze masanzo gantata galyo,” u bwatenda Yehowa, Mwiya Mayombo, “nu nne natikye bwagi bwa kisi kikyo mu busi bumozi. 10 Mu busi bubo,” u bwatenda Yehowa, Mwiya Mayombo, “na muntu na muntu abuzie munyage kwikala nage gansina muzabibu nu muti wage wa biguma.”