Miti ibili za zeituni
4
1 Mwanzelo wantendaga asubizie nu angyukizie anga bukuyukibwa muntu ku tulo. 2 Ambuzizie bunee: “Wamona ku kikizi?” Namwakwide bunee: “Namona ku kyanikilo kya olo, gamozi na nyungu za kubika makiti gantata gakyo, nu tusuku mutubakamo nu mimpondo za kubasia makiti ku kasuku na kasuku. 3 Lingo kuli miti ibili za mizeituni bwigi nakyo, umozi ku seidume nu ungo ku seikazi.”
4 Nabuzizie mwanzelo watendaga na nne bunee: “Mukota wane, bibino bili bikizi?”
5 Mwanzelo watendaga na nne anakwide bunee: “Ndi ntwizi bwisulilwa bwa bibino?”
Namwakwide bunee: “Ee, nsizi, mukota wane.”
6 Nu ambwide bunee: “Lilino lili iyuki lya Yehowa kuli Zerubabeli bunee: ‘Ta ku mpumba, nu ta ku magala; tondo ku Muuza wane,’ u bwatendile Yehowa, Mwiya Mayombo. 7 Ee mwiduko munene, uwe uli nazi? Lwabusio lwa Zerubabeli wabe kibitabita. Nkungu zezo akalusia ikozi lya gantata nu kwalalukwe bunee: ‘Kalaga akase mponga! Kalaga akase mponga!’”
8 Iyuki lya Yehowa lyavule lingo kundi kutenda bunee: 9 “Maboko ma Zerubabeli mabikile kibanza kya numba zeno, nu maboko mage mazisile. Nu wamenye buno Yehowa, Mwiya Mayombo, u wansingile kumuli. 10 Nazi ukubenga busi bwa bitondo bikeke? Tutuno tusuku mutubakamo twabogeboge gatwamone muzigi wa kulindika mu maboko ma Zerubabeli. Tutuno tusuku mutubakamo tuli meiso ma Yehowa makwenda nako nako mu kisi kinsania.”
11 Nu namubuzizie lingo bunee: “Bwisulilwa bukizi bwa miti zeno ibili za mizeituni zili ku seidume nu ku seikazi kwa kyanikilo kya tusuku?” 12 Nu namubuzizie lingo bunee: “Bwisulilwa bukizi bwa ntabi zeno ibili gamozi na mimpondo za olo zikubasia makiti m'idangi lya olo?”
13 Nu anakwide bunee: “Ndi ntwizi bwisulilwa bwa bibino?”
Natendile bunee: “Ee nsizi, mukota wane.”
14 Nu antendile bunee: “Babano beli basombolwa babili babongibwa mwambo buno bakitile Yehowa wa kisi kinsania.”