Idagano lya busi bwa Lonio
3
1 Kabebe ku mwino wa buguni nu nsese; mwino wiyala na beiti! 2 Ntanzile iyuki lyampa, aba lya Yehowa. Ntanzile lusungu, nu ntakatizizie ku Yehowa. Nteikundizie ku Kalaga wage. 3 Munkatini mwage bakota bage beli anga bimbwe bikuzuga; nu ngatu zage zili anga mboa za mwigolo zitanalanga kampa aaba nu ku nindunindu. 4 Balengania bage beli binsalansala nu bengelezi; basankoga bage bakubigia kiziki kyasililila; bakunyega mulembe wa Kalaga. 5 Yehowa eli wisanana munkatini mwago. Ntakukita bwagi. Nindunindu na nindunindu akwatula milondo zage mu kyengi, nu ntaneida aba kampa. Tondo wozo mwagi nteli na nsoni.
6 “Nazikizye bilongo; biziki byabo byalanga byatumwinwe; nabubizie nzila zabo nu takuli ukutinga muzo. Miino zabo zasambulwa, takuli muntu aba umozi. Takuli mwiya mwino. 7 Natenda ku mwino bunee: ‘Lebelebe wankue boba; witabizie kusungulwa na nne.’ Ububo kiziki kyage takyazimine, nu nsungio zane tazabase kweli. Tondo basasizie kwibigia mu makitilo mabo mansania.” 8 Yehowa atenda bunee: “Ku kabamba kakano mundindile aaba nu busi bunemane kulondozia. Kubuno nimika buno nakundamanie bilongo; ku mukundamano wa makota kubabalanganizia bukali bwa bongoa bwane; kubuno kisi kigimagima kyagie na keiya ka lugi lwane.
9 Mu nkungu zezo nagalukye bilongo ku mutendezi musoga, buno babo bansania bavwame kumana izina lya Yehowa nu kumukitila mu kwitabizania kumozi. 10 Kutukila lisilya lya nuuzi za Etiopia, bakumbamizi bane, babo bantu bane babalanganizibwe, balusie kayulo kane. 11 Mu bubo busi ntukamona nsoni ku kabamba ka makitilo mobe mansania mawanagide namo; kubuno ku nkungu zezo natikye beiya lwikotio lwabo munkatini mwobe, nu ntwikake lingo mu mwiduko wane wasililila. 12 Tondo nasige munkatini mwobe bantu ba lwanzo nu babota, nubo bakatizie izina lya Yehowa. 13 Babo baIsraeli basigede tabakite lingo bwagi aba kutenda buza; nu mubo tamwamoneke lulami lwa bwengelezi kubuno balie nu kwiyombeka, nu takuli muntu wabakisie.”
14 Ee mukinga wa Sayuni, imba! Ee Israeli, laluka n'iyuki lyobe! Ee mukinga wa Yerusalema, bogaboga nu kuba na kyelele na mutima unsania! 15 Yehowa atikya nsungio zobe; asubizie beiti bobe kumbusa. Yehowa, u Mukota wa Israeli, eli gamozi nobe; ntwakue boba lingo.
16 Bubo busi bwabulwe ku Yerusalema bunee: “Ee Sayuni, ntukue boba; maboko mobe tamatambe. 17 Yehowa, Kalaga wobe eli munkatini mwobe. Eli na magala ma konia; abogeboge nobe nu kuba na kyelele; akubobelezie mu lutundo lwage; abogeboge nobe mu kwimba.
18 Natikye kumuli tubebe twa bisagulo byakakizizibwe, kubuno bili nsoni nu muzigo kumuli. 19 Lola, mu zezo nkungu nasungie babo bansania bakusungizie. Nonie bitunga, nu kukundamania babo bapumbizibwe; nabakase lutanuno nu lukumu mu bisi binsania bibamonine nsoni mubyo. 20 Ku nkungu zezo nkamusondelezia. Ku nkungu zezo nkamukungika, kubuno namukase lutanuno munkatini mwa bilongo binsania bya kisi; nkungu zinamusubizie bakandwa ku meiso meinyu,” u bwatenda Yehowa.