HABAKUKI
1
1 Bulengania bwatukile ku Yehowa bwakasilwe ku mulengania Habakuki. Mbuzio za Habakuki
2 Ee Yehowa, nkungu nkizi zinalile, nu uwe ntukuziga kunnungwilila? Nkulila kuguli ku kabamba ka bwiti, nu uwe ntukuziga kunonia. 3 Kubuni ukundolesia bwagi, nu kulola bitondo bya buliabulia? Kubuno kubiga nu bwiti bili lwabusio lwane, nu kuli nsake, nu myango zikubasa. 4 Ku kabamba kakano milembe zatamba, nu lusungio talwakinde; nu bagi bakutimba wisanana buno lusungu lukubasa nulo lukutikibwa.
Iyakulo lya Yehowa
5 Lolazi munkatini mwa baBilongo, nu lolazi nu kwangama nunse, kubuno nkukita kitondo mu bindi byeinyu kimutakakatizia aba munakisambalilwa. 6 Kubuno nkuzanzula baKaldea, babo bantu bakali nu kusasia kukita, bakutinga munkatini mwa kisi, buno bangate biziki biteli byabo. 7 Babo beli bantu babi nu bakukubwa boba nunse; lusungio lwabo nu bunene bwabo bukutuka mu mitima zabo bobenyene. 8 Farasi zabo zili nsasia kutinga ngozi nkali za mu lubanda, nu babakami ba farasi zabo beli na lwikotio. Babakami ba farasi zabo bakuvwa kutuka bulazi, nu bakulenga anga ndiu zezo zikulenga lubilo nkungu za kulia.
9 Babo bansania bakuvwa na kabenga; bilungi byabo bikuvwa anga lumpumpu lukutuka kukutukaga kisongo kya busi, nu bakusongya bakandwa anga misege. 10 Bakwililika bakota, nu bangati beli anga bakubengwa ku meiso mabo; nu bakuseka miino za matinino mansania, kubuno bakobaka byindo na bisogo nu kuzikata. 11 Kusila bakutinga lubilo anga lumpumpu, beiya katati ka bwagi, nu magala mabo meli mu kalaga kabo.
Lungo lubuzio lwa Habakuki
12 Ee Yehowa, ndi ntuli mwiya milyalya na milyalya? Ee Kalaga wane, nu Wasililila wane, tatukakua. Ee Yehowa, wabasombwede buno bansungie; ee Lwanda, wababikile kusungia. 13 Uwe uli na meiso masoga nunse buno ntulole bwagi, nu ntulole bateisanana. Ububo, ku kabamba kakizi ku ukulola babo bengelezi? Nu kubuni wikala kibibi nkungu zikumena mwagi wozo wisanana kumutinga?
14 Wakitile bantu kuba anga byena bya mu kitatenge, anga bikugelegeta biteli na mwangati. 15 Babi bakubakata ku kalobo kabo, nu kubakata mu tukila twabo, nu kubakundamania mu matilu mabo; ku kabamba kakano bakubogaboga nu kutananizibwa. 16 Ku kabamba kako bakukasana tuyulo ku tukila twabo nu kugisia aliga ku matilu mabo, ku kabamba ka makila mage kibombo kyage kyalunda, nu idia lyage lili lingi.
17 Umpanga ndi akatikagia beli mu kakila kage, kwita bantu ba bilongo nunsania geteli kubakwila kyombo?