ZEFANIA
Bindi bya lusungio lwa Yehowa
1
1 Iyuki lya Yehowa lyavule ku Zefania, mwana wa Kushi, mwana wa Gedalia, mwana wa Amaria, mwana wa Hezekia, mu bindi bya Yosia, mwana wa Amoni, mukota wa Yuda. Lyatendile bunee: 2 “Nazikye nunse bintu binsania kutuka ga kisi,” u bwatenda Yehowa. 3 “Natikye muntu nu nyama, natikye tuzoni twa mpelela, nu byena bya kitatenge, nu makozi makukikitania gamozi na bagi; nu nazikye bantu ba kisi kinsania,” u bwatenda Yehowa. 4 “Nu nalambye kuboko kwane ku Yuda, nu ku bantu bansania ba ku Yerusalema; natikye byasigede binsania bya Baali ga kikino kiziki, u meina ma basankoga ba mpala gamozi na basankoga ba nkisi. 5 Babo bakukumbamina mayombo ma mwigulu gantata numba; babo bakukumbamina mu kulumbila Yehowa nu nti bakulumbila ku Moleki tondo; 6 nu babo bakule kiti mu kuyanga Yehowa, nu babo batakulonda Yehowa aba kumubuzia.”
7 Ikalazi kibibi lwabusio lwa Yehowa, Mwiya Bwangato Bunsania, kubuno busi bwa Yehowa buli bwigi; kubuno Yehowa alongeka kisansa, asombwede bageni bage. 8 “Nu bukaba buno mu bubo busi bwa kisansa kya Yehowa, nazikye bakota nu bana ba bakota; nu bansania bavwalikibwa nsulu za bageni. 9 Nu mu bubo busi nasungie babo bansania bakusuluka kitiko kya lwibi; babo beizazia numba za mukota wabo na bukali nu bwengelezi.”
10 Yehowa akutenda bunee: “Mu bubo busi kwabe milaki ku lwibi lwa Byena, nu idilo kutuka ku kingo kyindi kito kya mwino; nu muzumio munene kutuka ku miduko. 11 Lilazi, inyuwe bantu ba ku Makitesi, kubuno bakunzia beinyu bazike, nu babo bansania bagalukagia feza bazike.
12 Nu bukaba mu nkungu zezo, nakulungule Yerusalema na kasuku; nu nasungie babo balandikana na nsenga za maku, nu bakutenda mu mitima zabo bunee: ‘Yehowa ntakite kampa aba busoga aba bubi.’ 13 Bikulo byabo byakasanwe ku banyagi; nu numba zabo zendulwe. Bobake numba tondo tabakeikala muzo, nu bayike masoa ma biguma bya mizabibu tondo tabakanua maku mabyo.
14 Busi bunene bwa Yehowa buseli bwigi; buseli bwigi nu bukuvwa lubilo nunse. Ungwililazi! Idilo lya busi bwa Yehowa lili lya kabebe, nu ipuka likumana mibila za lubaba mubo. 15 Bubo busi buli busi bwa bongoa bwa Yehowa, u busi bwa tubebe nu kulila, nu busi bwa mulubu nu muziko, nu busi bwa kapilo nu mwizi mukali, nu busi bwa lutundutundu nu kapilo, 16 nu busi bwa monze nu tukemi twa bita ku miino za mikolo nu biziki byazo byasakama.
17 Nu nalusie kabebe ku bantu; bende anga byuku kubuno bagide Yehowa; nu mikila zabo zabalanganibwe anga mukungu nu misuna zabo anga iyala.”
18 Aba feza zabo aba olo zabo tazavwame kubakulula mu bubo busi bwa bongoa bukali bwa Yehowa; mu bukali bwa bongoa bwage azikye kisi kinsania, kubuno azikye kitangalabesi bantu bansania bakwikalaga mu kisi.