3
1 Masego ma Habakuki mulengania, meimbilwe na shigionoti. a2 Ee Yehowa, nungule misagu zobe; nkwangama ku miganogano zobe. Yukya mulimo wobe, mu bindi byeitu menyesia, nu mu lusungio kengela mponga.
3 Kalaga, Wozo Wasililila, avule kutuka Temani, nu Wasililila kutuka mwiduko Parani. Kengela kikyo! Lutanuno lwa Kalaga lwakukide igulu, nu kisi kiyala luganuno lwage. 4 Kusana kwage kwabezaga anga kyengi. Abezaga na misungu za kyengi kutuka mu kuboko kwage, ku kiziki kya kubiswa mpumba zage. 5 Lusambo lukali lwendile lwabusio lwage, nu makangania ma keiya matukile ku magulu mage. 6 Emanine, agiliminizie kisi; alolile nu kusalimia bilongo, nu miduko za milyalya zabalanganizibwe; miduko za milyalya zagwede. 7 Namonine ku hema za Kusani mu mbabazio, nu ku numba za Midiani mu kabebe.
8 Yehowa, ndi ongedwe nuuzi? Ndi bongoa bwobe bwabezaga ku nuuzi nkeke? Ndi wabezaga na bongoa ku kitatenge gawabakamine ga farasi zobe nu ga tuyanga twobe twa lonio? 9 Bunkanda bwobe bwakitwa bwasi bwasi nunse, nu wamanine misungu zobe mingi nu zili na magala. Kengela kikyo. Wabeganizie kisi na nuuzi. 10 Miduko zakumonineko nu kukua boba; mwiyalo wa mazi watingile, maziba mabilile nu kusakika bimpumi byamo ku Yehowa. 11 Kisongo kya busi nu mwezi byemenne mu biziki byabyo ku kyengi kya misungu zobe nkungu zizendile, nu ku kusana kw'isumo lyobe likukelima.
12 Watingile mu kisi ku mbabazio; wapepile baBilongo ku bongoa. 13 Wabasizie lonio ku bantu bobe, nu lonio ku mubongibwa wobe; wazikizye mwangati wa kisi kya babi, nu walolesizie mundulu wage unsania, kutukila itoe aaba nu ku masindi. Kengela kikyo. 14 Wabotwede itoe lya bantu bage ba bita na kasusula kobe; bavule anga lumpumpu lwa kutimba kutubalangania, nu kubogaboga anga kumena bazambi ku kakungu. 15 Wanyantile kitatenge na farasi zobe, kuzangiazangia kibombo kya mazi meingi.
16 Nungule, nu mutima wane wagiliminne, nu milomo zane zatengiletengile ku iyuki lilyo; kubola kwingide mu makwa mane, nu magulu mane magiliminne. Tondo nalindile na nkiki aaba nu namone kuvwa kwa kubigibwa kwa bantu bakutunyaga. 17 Aba muti utakubasia maluba, aba biguma tabyamoneke mu miti, aba miti za makiti zoma nu masoa tamakolama biguma, aba kibombo kya mikoko takyabe mu mukumba, aba kibombo kya ngombe takyabe ga nusu, 18 tondo nabogeboge mu Yehowa, nu natumetume mu Kalaga wa lonio lwane. 19 Yehowa, Mwiya Bwangato Bunsania eli magala mane; nu We akukita magulu mane anga magulu ma kangolo, nu akuntabangia ku biziki byane byasakama.
Ku mwimbisia wa nimbo ga bindanda.