NAHUMU
1
1 Kulolesibwa kwa Ninawe. Mukanda wa kalolesio kamonine Nahumu muElokosi: 2 Yehowa eli Kalaga wa lugi ukusuba musubo; akusuba musubo nu eiyala na bongoa. Yehowa akusuba musubo ku babo bakwenda nage myango, nu akulanga bongoa ku beiti bage. 3 Yehowa ntakusasia kongoa; eli na mpumba ningi nu ntasigilile beiya bwagi aba kakeke. Yehowa eli na nzila zage mu lumpumpu lukutimba na mbula nnene; bimpa bili mukungu wa magulu mage. 4 Akuzugila kitatenge nu kukikamia, nu akukamia nuuzi insania. Basani nu Karmeli zikukama, nu maluba ma Lebanoni makuoma. 5 Miduko zikugilimina lwabusio lwage, nu nkangamo zikunyenguka, nu kisi kikugaluka lwabusio lwage gamozi na bansania beli mukyo. 6 Nazi unavwama kwemana gaakongoa? Nu nazi wikale ku bukali bwa bongoa bwage? Bongoa bwage bukukubuka anga keiya, nu nanda zikwatika lwabusio lwage.
7 Yehowa eli musoga; eli itinino mu nkungu za milondo; akulanga babo bakumukatizia. 8 Tondo na mwiyalo munene wa kitatenge azikye nunse Ninawe, nu kuyanga beiti bage mu kapilo.
9 Mukukengela kikizi na Yehowa? Azikye nunse makengelo mamo nu tubebe tuto tatukavwa limbizi lya mabili. 10 Kubuno bakatwe na mikele, nu kukindwa na maku mabanue; bazikibwe anga bisugu byoma. 11 ee Ninawe, umozi atukile muguli ukukengela bubi ku Yehowa; nu eli mukazi wa nango mbi.
12 Yehowa akutenda bunee: “Aba ndi beli na magala mansania nu kuba beingi, nti baseswe gansi; ee Yuda, aba nakusungizie, nsikakusungia lingo. 13 Nu kano kaluma naketule kisanga kyobe, nu nakutule miyololo zobe.”
14 Yehowa akakizizie ku kabamba ka Ninawe bunee: “Ntukaba na kibuti kili n'izina lyobe mu kisi. Natikye numba za tulaga twobe, nkisi za kubaza nu za kunyenguka; nakumbile nsinda, kubuno uli mubi nunse.”
15 Tambiazi meiso ku miduko nu kulola ku magulu ma mugenzi ukusambala bubobelelo! Ee Yuda, langa bisagulo byobe, nu sililizia bilumbilo byobe, kubuno mwagi ntatinge munkatini mwobe; asila kuzikibwa nunse.