Kubigibwa kwa baIsraeli
7
1 Kabebe kundi kubuno nili anga muntu ukutubula biguma nu takuli kimozi, nu anga ukusongya biguma bya muzabibu tondo takuli kyampa. 2 Muntu musoga wa Kalaga azimina mu kisi; takuli muntu wisanana munkatini mwa bantu; bansania bakukobela kukubula mikila, muntu na muntu akutegela mubuto wage na bukila. 3 Maboko mabo meli ku bubi buno babukite nunse; bakota nu ngatu bakusega nkaso, nu muntu munene akusambala bwagi bwa mutima wage. Bubo bakubukita gamozi. 4 Munkatini mwabo muntu musoga eli anga mikele, nu wisanana eli mubi kutinga mukolo wa mikele. Lusungio lwobe lwabe anga bwatondile bagila bobe; nu nkungu za kuzangazanga kwa bantu ziseli kayikayika. 5 Tamulemanine kilemba, tamubike kilemanizio kyeinyu ku musondelezia, langa kanua kobe ku wozo ukwiyombeka ku bukuba bwobe. 6 Kubuno musikila akulinga isi, nu mukinga akubenga nina, nu mukamwana akusaka na ninabyala. Mwiti wa muntu eli wa numba zage.
7 Tondo nne, nalole ku Yehowa; nalindile Kalaga wa lonio lwane; Kalaga wane anungwe.
Yehowa akuvwa na lonio
8 Ee mwiti wane, ntubogeboge ku kabamba ka kugwa kwane. Nagwede, tondo nazanzuke; aba ndi nikala mu kapilo, Yehowa abe kyengi kyane. 9 Nabe na nkiki ku lusungio lwa Yehowa kubuno namwagide; aaba nu gaantendele ku kitondo kyane nu kunkitila bwisanana. Yehowa andusie ku kyengi, nu nalole kwisanana kwage. 10 Kusila mwiti abumoneko nu nsoni zamukukile. Ambwide bunee: “Kuni kuli Yehowa, Kalaga wobe.” Meiso mane mamulole nkungu zagoe, ububo anyantwe anga bisogo mu nzila.
11 Mu busi bukobakwa mikolo za mwino, ububo busi bukatanunwa myaga zobe. 12 Mu bubo busi bantu ba ku Yerusalema bakavwa kugo bakatuka ku Asuria nu miino za Misri, aba kutuka ku Misri aaba nu kubasa ku Luuzi Furati, kutukila kitatenge aaba nu ku kingo kili bulazi nunse, nu kutukila ku mwiduko aaba nu ku mwiduko guli bulazi. 13 Nu kisi kyabe anga kalula ku kabamba ka misako za bwagi bwa bantu bakwikalaga mukyo.
Kyombo kya Yehowa ku baIsraeli
14 Ee Yehowa, mulangi wa bantu, langa bantu bobe na musumbo wobe, u kibombo kya bupieni bwobe kikwikalaga umozi umozi mu lubanda, munkatini mwa Karmeli. Balisie mu Basani nu Gileadi anga bindi bya wakalazi.
15 Anga ku bindi bimwatukile ku Misri, namulolesizie miganogano.
16 Bilongo byamone nu kuba na nsoni ku kabamba ka magala mabo mansania; beidimbe minwe ku busundo, nu matuzi mabo tamungwe. 17 Balambe mukungu anga nzoka, anga bikugelegeta gansi anga nzoka ga kisi. Bavwe nu kugilimina kutuka ku kubisama kwabo; bavwe na boba ku Yehowa, Kalaga weitu, nu bamukue boba.
18 Nazi uli Kalaga anga uwe, ukusigilila bubi nu ukwibilila mibi za bantu bobe? Ntukulanga bongoa bwobe ku milyalya, tondo ukutananizibwa na mponga. 19 Wagaluke lingo nu kutukwila kyombo; wanyante bwagi bweitu na magulu mobe; nu uwe wise bwagi bweitu bunsania mu maziba ma kitatenge. 20 Wakitile Yakobo bulili nu Abrahamu kyombo, anga buwalumbilide ku batateiswe kutukila wakalazi.