YONA
Yona atina Yehowa.
1
1 Iyuki lya Yehowa lyavule ku Yona, mwana wa Amitai, lyatendile bunee: 2 “Zanzuka, wende ku Ninawe, wozo mwino munene, ulaluke n'iyuki inene buno bwagi bwabo buse bwamoneka bunene lwabusio lwane.” 3 Tondo Yona azanzukile nu atinine meiso ma Yehowa nu endile ku Tarsisi. Ububo endile ku Yopa, asangile bwato bukwenda ku Tarsisi. Aligile bukunza bwa lugendo, nu eingide mubo buno ende nabo ku Tarsisi kubisama bulazi na meiso ma Yehowa.
4 Tondo Yehowa asingile lumpumpu lunene mu kitatenge nu bimpumi byabede binene mu kitatenge aaba nu bwato bwabede bwigi kwatika. 5 Bakambi ba bwato bakule boba, balilile muntu na muntu ku kalaga kage. Beisile mizigo zabezaga mu bwato mu kitatenge buno bwato buleluke. Tondo Yona asangilwe akumba kunsi ku tumpindampinda twa bwato nu eiyombekile ku tulo. 6 Mwemanizi wa bwato avule kweli nu amubuzizie bunee: “Kubuni kuwiyombeka? Yuka nu lila ku Kalaga wobe! Embe kalaga kobe anatukwila kyombo nu kutonia.”
7 Bakambi bakalile lwango nu kutenda bunee: “Twendazi kwesa mbale, tumenyazi nazi uli na katati mutuli.” Besile mbale nu Yona agwede mbale. 8 Bamubuzizie bunee: “Tubule kano kaluma kiwakitile buno kisoa kikino kyatubasila. Uwe uli nazi? Mulimo wobe guli mukizi? Uli wa kisi kikizi? Nu uwe uli wa kilongo kikizi?”
9 Abakwide bunee: “Nne nili muEbrania nu nkukumbaminaga Yehowa, Kalaga wa mwigulu, wozo wabumbile kitatenge nu kisi kyakama.”
10 Babo bantu bakule boba nunse; bamubuzizie bunee: “Kikizi kiwakitile?” Bantu bamenyine buno akutina Yehowa, kubuno abasolede kalazi. 11 Kumbusa bamubuzizie bunee: “Buni butukukita, buno kitatenge kitubotele?” Kubuno kitatenge kyitide na bimpumi.
12 Ababwide bunee: “Nkatazi nu kunisa mu kitatenge. Bubo kitatenge kyamubotele, kubuno nizi buno kino kisoa kinene kyamuvwilide ku kabamba kane.”
13 Tondo bantu balugile bwato bubibu buno basubye lingo ku mutili, tondo tabwakulungenne kubuno kitatenge kyitide nunse kubeli na bimpumi. 14 Ububo balilile ku Yehowa, Kalaga wa Yona, bunee: “Tukukusega, ee Yehowa, buno ntutwite ku kabamba ka kalamo ka muntu wono. Ntutubikile katati ka mikila ziteli na kabamba kubuno uwe u Yehowa ukukita anga buukutunda.”
15 Kumbusa bakatile Yona, nu bamwisile mu kitatenge; nu bimpumi bya kitatenge byabotile. 16 Babo bantu bakule Yehowa boba nunse; bamukitide kayulo nu bamulumbilide bilumbilo.
17 Yehowa abikile kyena kinene kayikayika kumena Yona; nu Yona abede munda mwa kyena bindi bisatu, musi nu kindi.