OBADIA
Bulengania bwa lusungio lwa Edomu
1
1 Kalolesio kamonine Obadia: Bubuno u bukutenda Yehowa, Mwiya Bwangato Bunsania ku kitondo kya Edomu bunee: “Tungule ku musagu watukile ku Yehowa, nu mugenzi wasingilwe ku bilongo kutenda bunee, ‘Zanzukazi, nu twendazi kwitana nabo.’”
2 Yehowa akutenda bunee: “Lolazi, namubikile kuba kilongo kikeke munkatini mwa bilongo nu mukubengwa nunse. 3 Lwikotio lwa mutima weinyu lwamwengelede, inyuwe bakwikalaga mu tulimba twa miduko zasakama. Mu mitima zeinyu mukutenda bunee: ‘Nazi ukatugezia gansi?’ 4 Mukobaka kwigulu anga ndiu; nu kusakamia biziki byeinyu anga nkeninkeni, tondo nkamugezia,” u bukutenda Yehowa.
5 “Ndi beibi bavwa kuguli, nu banyagi mu kindi, ndi tabanamwibila byabakukya tugu? Ee bunene bwa kuzika bumukazikibwa! Ndi bakukola bavwa kukola biguma, ndi tabanasiga bimozi? 6 Tondo buni bukasambulwa baEsau! Nu masuku mage makanyagwa!
7 Babo bansania bakitile idagano nobe bakamusindika ku myaga zeinyu; nu beida beinyu bakamwengelela nu kumukinda. Babo bakulia idia n'inyu bakamutegela matega, tondo uwe Edomu ntukamamonako.” 8 Bubuno u bukutenda Yehowa bunee: “Mu busi bubo ndi nsikazikya beiya menge ba Edomu nu beiya bumenyinino mu babo beli ku mwiduko wa Esau? 9 Ee Temani, mu busi bubo mapuka meinyu bakakua na boba nunse, buno bansania ba mwiduko wa Esau bakeitwa na wozo muziko.
10 Ku kabamba ka bwiti bweinyu ku mubuto weinyu Yakobo, mukakua na nsoni nu mukazikibwa ku milyalya. 11 Mu busi bwatikizye bageni bikulo byabo mwabasigile. Geingide bageni mu Yerusalema kwesa mbale mugo buno bagubeganie, mwabezaga anga bantu beli gamozi nabo.
12 Tondo tamwatunganenne kubogaboga mu busi bwa kabebe ka mubuto wobe, nu tamwatunganenne kubogaboga ku bantu ba Yuda ku busi bwabo bwa kuzikibwa, nu tamwatunganenne kutenda na lwikotio mu busi bwa tubebe twabo. 13 Tamwatunganenne kwingila ku lwibi lwa bantu bane mu busi bwabo bwa lusungio. Tamwatunganenne kubogaboga na mbabazio zabo mu busi bubo bwa lusungio. Tamwatunganenne kunyaga bikulo byabo mu busi bubo bwa tubebe. 14 Tamwatunganenne kwemana ga makano ma nzila buno mwite babo bakutina, aba kukanda babo basigala ku busi bwa tubebe twabo tunene.
15 Kubuno busi bwa Yehowa buse bwigi ku bilongo binsania. Anga bumwakitile u bumukakitwa; misako zeinyu zikasubya kumuli. 16 Kubuno anga bumwanune gantata mwiduko wane wasililila, u bukanua bilongo binsania ku bindi binsania. Ee, bakanua nu kumena; nu bakaba anga bubatabezaga.
BaIsraeli basakikwa.
17 Tondo mu mwiduko wa Sayuni mukaba itinino nu kusililila. Nu baYakobo bakeiyana bwiyani bwabo. 18 Nu numba za Yakobo zikaba anga keiya, nu numba za Yosefu zikaba anga ngulumina za keiya, nu numba za Esau zikaba anga bisesa; bikagisibwa nu kuzikibwa, aba takukasigala wampa wa kikanga kya Esau.” Bubo u bukutenda Yehowa.
19 “Bantu ba ku Negevi bakeikala mu miduko za Esau, nu bakeikala mu kibitabita kya baFilistini. Nu bakeikala ga nkangamo za baEfuraimu nu za Samaria. Nu baBenjamina bakeikala mu Gileadi. 20 Nu bakobe b'iyombo lya babo ba Israeli beli munkatini mwa baKanana, bakeiyana kisi aba nu ku Zarepata; nu ba ku Yerusalema bekilwe ku bukobe kwigizibwa ku Sefaradi bakeikala mu miino za Negevi. 21 Nu bakuluzi bakabakama ku mwiduko wa Sayuni kwangata miduko za Esau; nu bukota bukaba bwa Yehowa.”