AMOSI
Lusungio lwa Kalaga ku beiti ba Israeli
1
1 Moki ma Amosi, umozi ku balangi ba mikoko ba ku Tekoa: amonine ku tulolesio twa Israeli ku nkungu za bwangato bwa Uzia, mukota wa baYuda, nu ku bindi bya Yeroboamu, mwana wa Yoasi, a mukota wa Israeli, myaka ibili lwabusio lwa kaningini ka kisi. 2 Atendile bunee: “Yehowa azuga kutukila Sayuni, nu alaluka n'iyuki kutuka ku Yerusalema. Biziki bya kulisizia ga mikoko byakama nu nkangamo za Karmeli zoma.”
3 Yehowa akutenda bunee: “Ku kabamba ka kwaga kwa masatu kwa Damasiki nu kwa manazi nsikagalukya lusungio lwabo kubuno basuswide Gileadi na byuma bya kususula. 4 Nkasinga keiya ku numba za mukota Hazaeli nu kugisia numba nnene za Beni-Hadadi.” 5 Yehowa akutenda bunee: “Nkendula kilimba kya lwibi lwa Damasiki, nu kwita bantu ba ku Aweni b nu wozo uli na musumbo wa bwangato ku Beni-Hadadi. Bantu ba Aramu bakeigibwa ku Kiri.”
6 Bubuno u bukutenda Yehowa bunee: “Ku kabamba ka kwaga kwa masatu kwa Gaza nu kwa manazi, nsikagalukya lusungio lwabo kubuno bekile kilongo kinsania ku bukobe nu kukilusia ku Edomu. 7 Bubo nkasinga keiya gantata bitutu bya Gaza, nu kakazikya numba zabo nnene zagugumana. 8 Nkeita bantu ba Asidodi nu wozo uli na kisumbi kya bwangato ku Askeloni. Nagalukizye Ekuroni kuboko kwane nu misigala za baFilistini bazike.” Bubo u bukutenda Yehowa, Mwiya Bwangato Bunsania.
9 Yehowa akutenda bunee: “Ku kabamba ka kwaga kwa masatu kwa Tiro nu kwa manazi, nsikagalukya lusungio lwabo kubuno bekile kilongo kinsania ku bukobe ku Edomu nu beibilide idagano lya mibuto. 10 Nkagisia bitutu bya Tiro nu numba zago zagugumana.”
11 Yehowa akutenda bunee: “Ku kwaga kwa masatu kwa Edomu nu kwa manazi nsikagalukya lusungio lwage kubuno ayangile mubuto wage na mwene wa nganda. Ntabede na kyombo kubeli nu abezaga na bongoa kubeli ku milyalya. 12 Ububo nkasinga keiya ku Temani, nu kakagisia numba nnene zagugumana za Bosira.”
13 Nu bubuno u bukutenda Yehowa bunee: “Ku kabamba ka kwaga kwa masatu kwa baAmoni nu kwa manazi, nsyagalukye lusungio lwabo kubuno batile beimisu ba ku Gileadi buno bakate kibe kya kisi kyabo. 14 Ububo nkabangia keiya ku bitutu bya Raba kakagisia numba zabo nnene zagugumana. Bakalila n'iyuki inene lya bita ku busi bubo nu kukaba kisoa kinene nu lumpumpu lunene. 15 Nu mukota wabo akenda ku bukobe gamozi na bangati bage bakeke,” u bwatenda Yehowa.