YOELI
Yoeli akutonda bantu
1
1 Iyuki lya Yehowa lyavule ku Yoeli, mwana wa Petueli. 2 Inyuwe bakulu, ungwililazi! Nu inyuwe bakwikala mu kisi, tegekelazi! Ndi bitondo anga bibino byabede lingo mu bindi byeinyu, aba mu bindi bya basoinyuwe? 3 Sambalilazi bana beinyu bitondo bibino, nu bana beinyu ku bana babo, nu bana babo ku kingo kibuti. 4 Byasigile nzige byalibwa na mande, nu byasigile mande byalibwa na nsinsi, nu byasigile nsinsi byalibwa na nkonzo.
5 Inyuwe banuzi ba maku, yukazi, nu basazi bisozi! Nu inyuwe banuzi bansania ba maku, lilazi! Kubuno maku m'ituba matikibwa ku tunua tweinyu. 6 Kubuno kingo kilongo kingide mu kisi kyane, kili na magala nu kitanaganzwa. Meinyo makyo meli anga ma kimbwe nu kyili na tubanga-nyama anga tw'ibuti lya kimbwe. 7 Kyazikizye mizigi za biguma bya mizabibu zane, nu kututula bikuku bya miti zane za biguma. Azitutula nunse nu kuzisa bulazi, nu kusiga ntabi zago zenga.
8 Lilazi anga kikumi kyavwalikibwa ikunino ku kabamba ka kulilila iba wage wa bukinga bwage. 9 Kayulo ka bunga bwa ngano nu ka kunua twatikibwa mu numba za Yehowa. Basankoga beli bakiti ba Yehowa bakulila. 10 Masoa mazikibwa, nu kisi kikulila, ububo ngano zazikibwa, nu maku m'ituba makama, nu makiti meida.
11 Inyuwe balimi, kwazi nsoni! Inyuwe beiya mizigi za mizabibu, lilazi! Lilazi ku kabamba ka ngano nu shayiri, kubuno matubulo ma masoa mazikibwa. 12 Mizigi za mizabibu zoma, nu miti za tini zazika; makomamanga, nu kibila, nu mambu, aba miti insania za masoa zomine. Lebelebe mbogimbogi zakamine mu mitima za bantu.
13 Inyuwe basankoga, vwalazi makunino nu lilazi! Inyuwe bakiti ba kayulo, mulaluke! Inyuwe bakiti ba Kalaga wane, vwazi mwiyombeke kindi kinsania mu makunino! Kubuno nkaso za bunga bwa ngano, nu za kunua tazikubasa ku numba za kukumbamina za Kalaga weinyu. 14 Sambalazi kindi kya kwikanda idia nu ku kyengia; manazi musanganano wa kukumbamina. Kundamaniazi bakulu nu bansania ba kisi kuvwa ku numba za Yehowa, Kalaga weinyu, nu lilazi kweli. 15 Kabebe ku kindi kikino kubuno busi bwa Yehowa buli bwigi, nu bwabe bwa kuzikibwa kutuka ku Mwiya Mayombo.
16 Ndi idia talyabikilwe bulazi na meiso meitu? Ndi mbogimbogi nu kyelele tabyazimizibwe ku numba za kukumbamina za Kalaga weitu? 17 Mbuto zoma nunse, mipala zasigala bwasi; bigenge byasambuka, kubuno mbuto zida. 18 Buni bukwima nyama! Bibombo bya ngombe bikuzangazanga kubuno tabili na kiziki kya kulia. Aba nu bibombo bya mikoko bili na nsungio.