Kwigonga kukulusia mponga
14
1 Ee Israeli, subya ku Yehowa, Kalaga wobe. Wagwede ku kabamba ka bwagi bwobe. 2 Subyazi na bitondo byeinyu ku Yehowa nu kumusega bunee: “Sigilila bwagi bweitu bunsania, nu tusekele na mponga, buno tukasane kisansa kya luganuno lwa milomo zeitu. 3 BaAsuria tabanatonia; tatukenda gantata farasi za bita. Aba tatwatende lingo bunee: ‘u tulaga tweitu’ ku milimo za maboko meitu, kubuno nkubi zikumona mponga kuguli.” 4 Yehowa atenda bunee: “Nkabonia mu mibi zabo nu nkabatunda nunse kubuno bongoa bwane bwasila kubeli. 5 Nkaba anga mbula ku Israeli; akakolama maluba anga milili, nu mizi zage zikaba anga za muti wa Lebanoni, 6 nu ntabi nto zago zanage. Busoga bwage bukaba anga bwa muzeituni, nu nsunu zage nsoga anga Lebanoni. 7 Babo bakwikala kunsi kwa mpololo zago bakitila anga mbuto za ngano, nu kwasa maluba anga ma muzabibu; lukumu lwage lukaba anga lwa maku m'ituba ma Lebanoni.
8 Ee Efuraimu, uli na kitondo kikizi na nkisi lingo? Kubuno nne nkumwitabila nu nkumulanga. Nili anga muti wa muberoshi mubisi. Kundi wamone biguma byobe.”
9 Wozo uli na menge asongolole bitondo bibino; wozo ukumenyinina abimenye. Kubuno nzila za Yehowa zisanana; beisanana bakwenda muzo, tondo bagi bagoe muzo.