Danieli
Danieli nu banyage ku bukobe bwa Nebukadneza.
1
1 Ku mwaka w'isatu wa bukota bwa Yoyakimu, mukota wa Yuda, Nebukadneza, mukota wa Babeli, avule na mayombo mage ku Yerusalema, nu batimbile mwino na bintu bya bita. 2 Yehowa akasenne Yoyakimu, mukota wa Yuda, ku maboko mage. Nebukadneza ekile kyindi kya bintu bya numba za Yehowa ku numba za tulaga twage ku kisi kya Sinari; nu abibikile ku isuku lya tulaga twage. 3 Mukota akakizizie Aspenazi, mwangati wa mintembele buno asombole bamozi ku baIsraeli ba kikanga kya mukota aba kya mitonge, 4 basikila beteli na kabalibango, nu mbangilwa, nu beli na menge nu bumenyinino, banavwama kukitila mukota mu bukota bwage. Nu Aspenazi anabeigisia mutendezi nu kumenya mikanda za baKaldea. 5 Mukota alongekile buno bakaswe idia nu maku ma meza mage; batunganenne kwigisibwa myaka isatu nu kumbusa nti balinga kukitila mukota.
6 Munkatini mwabo mwabezaga Danieli, nu Hanania, nu Misaeli nu Azaria batukile ku kisi kya Yuda. 7 Tondo mwangati wa mintembele agalukizye meina mabo: Danieli akasilwe izina lya Beltesaza, Hanania abede Sadiraki, Misaeli abede Mesaki, nu Azaria abede Abedenego.
8 Danieli akengede mu mutima wage buno nteibigie na kulia idia aba kunua maku ma meza ma mukota; ububo asegile mwangati wa mintembele buno abasigilile ku mulembe wozo buno tabeibigie. 9 Kalaga abikile mu mutima wa mwangati wa mintembele buno akwile Danieli kyombo nu kubakasa mponga ku kitondo kikyo. 10 Mwangati wa mintembele akwide Danieli bunee: “Nkukua mukota wane boba, wozo wamukakizizie lukita lwa kulia kweinyu nu kunua kweinyu. Kubuni amone ku bilungi byeinyu tabili bisoga anga bya ba lugi lweinyu? Ndi bubo, nti ananita.”
11 Nu Danieli akwide mulangi wabikilwe na mwangati wa mintembele kulanga Danieli nu Hanania nu Misaeli nu Azaria bunee: 12 “Twakusega kugeleka na bakiti bobe ku bindi ikumi, batukase tugu biyikanwa bya kulia nu mazi ma kunua, 13 nu kumbusa nti walola ku bilungi byeitu nu bya babo bakulia idia lya meza ma mukota nu nti wakitila bakiti bobe anga buwasombola.” 14 Ububo abongwilide nu abalindikile bindi ikumi.
15 Kusila kwa bindi ikumi, bilungi byabo byabezaga bisoga kutinga banyabo nu balundile kutinga babo baliaga idia lya mukota. 16 Ububo mwangati wa mintembele ntazigaga kubakasa idia isoga lya mukota nu maku mabakasagwa buno banue, nu abakasaga biyikanwa anga idia. 17 Nu ku babo basikila banazi, Yehowa abakasile menge nu bumenyinino nu mu kyigilo kyabo kinsania nu menge ma mikanda. Danieli abezaga na menge ma kwisula tulolesio tunsania nu ndozi insania.
18 Kumbusa kwa bindi byatendile mukota buno bende kubalolesia kweli, wozo mwangati wa mintembele avule nabo ku Nebukadneza. 19 Nu mukota atendenne nabo, nu munkatini mwabo bansania tamwamonekile ungo wigezye na Danieli nu Hanania nu Misaeli nu Azaria. Ububo balingile kukitila mukota. 20 Nu ku bitondo binsania bya menge nu bya bumenyinino byababuzagia mukota, amonine buno babezaga batinga bagila nu balaguzi ba bukota bwage bunsania mambizi ikumi.
21 Nu Danieli eizizizie aba nu ku mwaka mutangi wa mukota Kiro. a