Kwiyana kwa kikanga na kikanga kya baIsraeli
48
1 Nu atendile lingo bunee: “Mamano meli meina ma bikanga. Kyindi kimozi kya Dani kikaba ku lulenge lwa kwikazi, kutukila ku Kitatenge kusigelela ku Hetiloni nu Hamati aaba nu ku Hazari-Enani, gamozi na Damasiki guli ku mwaga ku lulenge lwa kwikazi kutukila kuntata aaba nu ku lulenge lwa kunsi. 2 Nu kyindi kimozi kya Dani, kya mwaga wa Aseri, kutukila kuntata aaba ku mwaga wa kunsi. 3 Kyindi kimozi kya Nafutali, ku mwaga wa Aseri, kutukila lulenge lwa kuntata aaba nu ku lwa kunsi. 4 Kyindi kimozi kya Manase, ku mwaga wa Nafutali, kutukila ku lulenge lwa kuntata aaba nu ku lwa kunsi. 5 Kyindi kimozi kya Efuraimu, ku mwaga wa Manase, kutukila ku lulenge lwa kuntata aaba nu ku lwa kunsi. 6 Kyindi kimozi kya Rubeni, ku mwaga wa Efuraimu, kutukila ku lulenge lwa kuntata aaba nu ku lwa kunsi. 7 Nu kyindi kimozi kya Yuda, ku mwaga wa Rubeni, kutukila ku lulenge lwa kuntata aaba nu ku lulenge lwa kunsi. 8 Nu ku mwaga wa Yuda kutukila ku lulenge lwa kuntata aaba nu ku lulenge lwa kunsi, kukaba kiziki kyasililila. Bungulu bwakyo bukaba mabusu tununu makumi mabili nu tutano, nu bulazi bukaba bumozi anga bingo byindi, kutukila ku lulenge lwa kuntata aaba nu ku lulenge lwa kunsi nu numba zasililila zikaba munkatini mwakyo.
9 Kiziki kyasililila ku Yehowa kikaba mabusu tununu makumi mabili nu tutano (25.000) nu bungulu mabusu tununu ikumi (10.000). 10 Nu bubo u bumukabegania kiziki kikyo kyasililila; basankoga bakaba na kiziki kimozi kili na bulazi bwa mabusu tununu makumi mabili nu tutano (25.000) ku lulenge lwa kwikazi. Nu mabusu tununu ikumi (10.000) ku lulenge lwa kunsi nu mabusu tununu ikumi (10.000) ku lulenge lwa kuntata, nu mabusu tununu makumi mabili nu tutano (25.000) ku lulenge lwa kwidume. Nu numba zasililila za Yehowa zikaba munkatini mwakyo. 11 Kiziki kikyo kikaba ku basankoga baswagibwa, bana ba Zadoki balangile makakizio mane, tababalangenne ku nkungu zabalangenne ba Lawi. 12 Kibe kikino u kibakaswe mu bwiyani bwa kisi, kiziki kyasililila nunse ku mwaga wa ba Lawi. 13 Nu ku mwaga wa kiziki kya basankoga ba Lawi bakakaswa kiziki kyabo bulazi bwa mabusu tununu makumi mabili nu tutano (25.000) nu bungulu mabusu tununu ikumi (10.000). 14 Nu tabakunzie kibe kikyo aba kugalukya kyindi kimozi kyakyo, aba kusiga, kubuno kili kyasililila kya Yehowa.
15 Nu kibe kikasigala kya mabusu tununu tutano (5.000) twa bungulu nu tununu makumi mabili nu tutano (25.000) twa bulazi, kikaba ku mwino nu masoa, nu biziki biteli na mulimo. Nu mwino munene ukaba munkatini mwakyo. 16 Bibyo bili bilindiko byakyo, lulenge lwa kwikazi lukaba mabusu tununu tunazi nu nkama itano (4.500), lulenge lwa kwidume tununu tunazi nu nkama itano (4.500), lulenge lwa kuntata tununu tunazi nu nkama itano (4.500), nu lulenge lwa kwikazi tununu tunazi nu nkama itano (4.500). 17 Kumbuga kwa mwino kwabe biziki bya kulisizia ga lusumba, ku lulenge na lulenge mabusu nkama ibili nu makumi matano. 18 Kyindi kyasigala ku ntungo za kiziki kyasililila kikaba mabusu tununu ikumi (10.000) ku lulenge lwa kuntata nu tununu ikumi (10.000) ku lulenge lwa kunsi; kibe kikyo kikaba masio m'idia lya bakiti ba mulimo. 19 Bakiti bansania ba mwino batukile ku bikanga binsania bya baIsraeli bakalima mukyo. 20 Nu kiziki kikyo kikaba mabusu tununu makumi mabili nu tutano (25.000) ku lulenge na lulenge, kikaba kiziki kyasililila nunse gamozi na kyindi kya mulimo.
21 Nu biziki byasigala ku lulenge na lulenge lwa kiziki kyasililila kya mwino bikaba bya mukota. Kutukila ku ntungo za kuntata kwa kiziki kyasililila aaba nu kubasa ku mwaga wa kuntata kwa kisi nti kiziki kyage kyabe na mabusu tununu makumi mabili nu tutano (25.000), nu kutukila ku mwaga wa kunsi kwa kiziki kyasililila aaba nu kubasa ku mwaga wa kunsi kwa kisi nti kiziki kyage kikaba na mabusu tununu makumi mabili nu tutano (25.000). 22 Ububo kiziki kya baLawi nu kiziki kya numba zasililila bikaba munkatini mwa kikyo kya mukota. Kikaba gasamba mwaga wa Yuda nu mwaga wa Benjamina.
23 Nu ku bingo bikanga bikusigala, kyindi kimozi kya Benjamina, kutukila lulenge lwa kuntata aaba nu lulenge lwa kunsi. 24 Nu ku mwaga wa Benjamina, kyindi kimozi kya Simeoni kutukila lulenge lwa kuntata aaba kunsi. 25 Nu ku mwaga wa Simeoni, kyindi kimozi kya Isakari, kutukila lulenge lwa kuntata aaba nu lwa kunsi. 26 Nu ku mwaga wa Isakari kutukila lulenge lwa kuntata aaba nu lwa kunsi. 27 Nu ku mwaga wa Zebuluni, kyindi kimozi kya Gadi, kutukila lulenge lwa kuntata aaba nu lwa kunsi. 28 Ku mwaga wa Gadi, ku lulenge lwa kwidume mwaga ukatukila Tamari nu kusigelela ku luuzi lwa Meriba-Kadesi, nu ku luuzi lwa Misri ku Kitatenge Kinene. 29 Nu kikino kili kisi kimwabeganie ku kwesa mbale mu bikanga bya Israeli kuba bwiyani bwabo, byabe byindi byabo, u bwatenda Yehowa, Mwiya Bwangato Bunsania.
30 Nu zeno zili miingilo za mwino: Ku lulenge lwa kwikazi bilindiko mabusu tununu tunazi nu nkama itano. 31 Nu nibi za mwino zabe na meina ma bikanga bya Israeli; nibi isatu ku lulenge lwa kwikazi; lwibi lumozi lwa Rubeni, lwibi lumozi lwa Yuda, lwibi lumozi lwa Lawi. 32 Ku lulenge lwa kuntata, bilindiko mabusu tununu tunazi nu nkama itano kwabe nibi isatu, lwibi lumozi lwa Yosefu, lwibi lumozi lwa Benjamina, lwibi lumozi lwa Dani. 33 Ku lulenge lwa kwidume bilindiko bya mabusu tununu tunazi nu nkama itano, kwabe nibi isatu: lwibi lumozi lwa Simeoni, lwibi lumozi lwa Isakari, lwibi lumozi lwa Zebuluni. 34 Ku lulenge lwa kunsi bilindiko mabusu tununu tunazi nu nkama itano kwabe nibi isatu: lwibi lumozi lwa Gadi, lwibi lumozi lwa Aseri, lwibi lumozi lwa Nafutali.
35 Nu mwino unsania watimbwe na bilindiko mabusu tununu ikumi nu kinana (18.000), nu izina lya mwino kutukila bubo busi lyabe, ‘Yehowa eli gago.’” a