Kalolesio ka luuzi lwa kalamo
47
1 Nu ansubizie ku lwibi lwa numba za kukumbamina, nu namonine ku luuzi lwatukile ku kitiko lwagela ku lulenge lwa kuntata, kubuno numba za kukumbamina zalolela ku lulenge lulo. Lwagelile ku lulenge lwa kwidume lwa numba, lwatingile kasenga ka kayulo ku lulenge lwa kwidume. 2 Ansondelezizie kutuka ku lwibi lwalolela ku lulenge lwa kwikazi, antimbizie ku nzila za kumbuga, ku lwibi lwalolela kuntata. Gago luuzi lwagelile ku lulenge lwa kwidume. 3 Gatukile wozo muntu ku lulenge lwa kuntata na muzigi mu kuboko kwage, alindikile mabusu kanunu kamozi, ansokezie mu luuzi, nu mazi manzindide mu tusindilo. 4 Alindikile kango kanunu kamozi, ansokezie mu luuzi nu mazi manzindide mu mazu. Alindikile kango kanunu kamozi ansokezie mu luuzi nu mazi manzindide mu kibunda. 5 Kumbusa alindikile kango kanunu kamozi nu lwabezaga luuzi luzindu kubuno mazi mabede meingi nu muntu ntanavwama kusoka mumo. 6 Ambwide bunee: “Uwe mwana wa muntu, ndi wamona ku bitondo bibino?” Kumbusa anekile kunsubya ku mutili wa luuzi. 7 Ganasubizie, namonine ku miti ningi ku mitili ibili za luuzi. 8 Ambwide bunee: “Luuzi lulo lwagela ku kisi kili ku lulenge lwa kuntata nu lwagela ku kisi kya Araba; lwagela ku kitatenge. a Nu gago gameingilile mu kitatenge, mazi makyo mabe masoga, tamabe na munkange. 9 Kunsania kwagele luuzi lulo bibumbwa binsania byalame ku kabamba kalo. Byena byili mulo byitile kubuno kunsania kwagele luuzi lulo, bibumbwa byabe na kalamo kasoga. Nu binsania byitile. 10 Nu bazubi bakemana ku mitili zalo nu kutega tukila twabo mulo kutukila Engedi aaba nu ku Eni-Eglaimu. Nu kwabe nkita ningi za byena nu byena byingi anga mu Kitatenge Kinene. b 11 Tondo bitanga nu myungulu zalo tabyabe na munago byasigwe kumoneka ku munkange. 12 Ku mitili ibili za luuzi kwase nkita insania za biguma. Nsamba zazo tazome nu biguma tabide nunse. Zakolamage biguma mwezi na mwezi kubuno mazi makutuka mu numba zasililila. Biguma byazo byabe bisoga kulia nu nsamba zasakile bantu.”
Myaga za kisi
13 Yehowa, Mwiya Bwangato Bunsania, antendile bunee: “Zeno zili myaga za biziki byabeganibwa gasamba bikanga ikumi nu bibili bya Israeli, byindi bibili ku baYosefu. 14 Nu mwabegane kisi kikino kimwiyana bulingilingi gamusamba, kubuno nalumbilide basoinyuwe kumukasa kyo nu kisi kikino mwakikaswe kukiyana.
15 Wono guli mwaga wa kisi; ku lulenge lwa kwikazi kutukila Kitatenge Kinene ku nzila za Hetiloni kwingila ku Zedada; 16 Hamati, Berota, Sibraimu guli gasamba mwaga wa Damasiki nu mwaga wa Hamati, nu Hazeri-Hatikoni, guli bwigi na mwaga wa Haurani. 17 Nu mwaga wabe kutukila ku Kitatenge kubasa ku Hazari-Enani kubasa ku mwaga wa Damasiki, nu ku lulenge lwa kwikazi, guli mwaga wa Hamati.
18 Nu ku lulenge lwa kuntata, mwaga wabe gasamba Haurani nu Damasiki nu gasamba Gileadi nu kisi kya Israeli, wagele mu Yordani nu mu mutili wa kitatenge wa kuntata aaba nu ku Tamari. Wono u mwaga wa kuntata. 19 Nu ku lulenge lwa kwidume, mwaga wabe kutukila Tamari aaba nu ku mazi ma Meriba-Kadesi ku luuzi lwa Misri nu ku Kitatenge Kinene. Wono guli mwaga wa ku lulenge lwa kwidume.
20 Mwaga wa lulenge lwa kunsi wabe Kitatenge Kinene, kutukila mwaga wa ku lulenge lwa kwidume aaba nu ku kiziki kili butunganana na Hamati, wono guli mwaga wa kunsi.
21 Ububo bumukababeganizia kisi kikino anga buli bikanga bya Israeli. 22 Nu gamwabeganie kisi ku kwesa mbale mukeiyana kyo inyuwe nu bageni beikalaga munkatini mweinyu nu bana bababutile. Bakaba anga bana ba Israeli babutilwe mu kisi. Bakeiyana kisi munkatini mwa bikanga bya Israeli. 23 Nu mugeni akakaswa bwiyani mu kikanga kyakwikala mukyo. Bubo u bukutenda Yehowa, Mwiya Bwangato Bunsania.”