Kulila kwa Yeremia.
Tubebe twa Sayuni
1
1 Buni bwazima mwino wabezaga na bantu! Wagaluka kuba anga musigala! We wabezaga munene munkatini mwa bilongo; wabezaga anga mukikulu wa mukota mu bibe bya kisi es'agaluka kuba mukobe. 2 Akulila nunse mu kindi, nu bisozi byage bili ku matama; munkatini mwa bakumutunda takuli umozi wa kumubibya. Beida bage bansania bamwitizie na nsoni, bagalukile kuba beiti bage.
3 Yuda eigibwa ku kabamba ka mbabazio nu milimo mikali, eimbibwa kwenda ku bukobe; akwikala munkatini mwa baBilongo; ntakumona mbogimbogi. Babo bamuyangaga bamusanga mu tubebe twage.
4 Nzila za ku Sayuni zili mu kililo kubuno takuli muntu ukuvwa ku busi bunene. Miingilo zage zili makindu; basankoga bage bakutonga, nu bakinga bage beli na tubebe; we wenyene eli na tubebe tunene.
5 Beiti bage bagaluka kuba bangati bage, nu basombi bage bakubogaboga. Yehowa amusungia ku bwingi bwa mibi zage; bana bage beigibwa kuba bakobe lwabusio lwa beiti.
6 Nu mukinga wa Sayuni aziminwa na lutanuno lwage lunsania; bakota bage beseli anga nkenge zitakumona idia, nu zikwenda geteli magala lwabusio lwa ukuziyanga.
7 Mu bindi bya nsungio zage nu bya kuzangazanga kwage, Yerusalema akukengela bintu byakutananizia bya wakalazi. Nkungu zakasenwe bantu bage mu kuboko kwa mwiti takwabezaga wampa wa kumukasia; beiti bage bamumonine ko, nu basekile bweseli bukindu.
8 Yerusalema akitile bwagi bunene, nu bubo eseli nsese. Bansania bamwanzaga bese bamubenga, kubuno bamumona mu mundulu wage; we wenyene akutonga nu kusubya kumbusa.
9 Nsese zage zabezaga mu mpindo za nsulu zage; ntakengede kuzinda kwage. Kusigulizibwa kwage kwaganizieganizie bantu; takwabezaga wampa kumubibya. “Ee Yehowa, lola mbabazio zane, kubuno mwiti wane ankindile.”
10 Musombi atolile na kuboko kwage bintu by'isuku lyage. Amonine buno baBilongo beingila mu kiziki kyabo kyasililila, babo bakakizizibwe na Yehowa buno tabeingile mu musanganano wobe.
11 Bantu bansania bakutonga gabakulonda idia. Bakasana bintu byabo byakutananizia buno bamone idia lya kulindia kalamo. “Ee Yehowa, lola nu kengela buno nise nabengwa.”
12 “Inyuwe bakutinga, ndi ta kili kena kumuli? Lolazi, ndi kuli kabebe kanene anga kanakitidwe, anga kansungizie na Yehowa mu bindi bya bongoa bukali?
13 “Kutuka kwigulu asingile keiya mu makwa mane, nu kamakindile. Ategile kakila ku masindi mane, nu ansubizie kumbusa. Ambikile ku kiziki kya kwikazi, nu kuntambia musi unsania.
14 “Akandile bwagi bwane na maboko mage nu kubuswika anga kikando mu ikosi lyane. Yehowa atambizie magala mane, nu ankasenne ku babo bansinavwama kwemana lwabusio lwabo.
15 “Yehowa asombile mapuka mansania meli munkatini mwane; amanine iyombo inene kunyanta basikila bane. Yehowa akukambutula mukinga wa Yuda anga biguma mu kansango.
16 “Ku kabamba ka bitondo bibino nkulila, nu meiso mane mabasia bisozi. Kubuno mubibya unavwama kubibya mutima wane eli bulazi na nne, bana bane basigala bobenyene na kyombo, kubuno mwiti akinda.”
17 Sayuni alambya maboko mage, tondo takuli umozi kumubibya; Yehowa akakizizie ku kabamba ka Yakobo buno beiti bage bamutimbe. Yerusalema eli anga kintu kya nsese munkatini mwabo.
18 “Yehowa akunkitila bwisanana, kubuno nasombile ikakizio lyage. Inyuwe bantu bansania, ungwililazi nu lolazi kabebe kane; bakinga bane nu basikila bane bekilwe ku bukobe.
19 “Namanine beida bane, tondo banengelede. Basankoga bane nu bakulu bane balekenne mu mwino nkungu zibeidondide idia lya kulindia kalamo kabo.
20 “Ee Yehowa, lola, kubuno nne nili na kabebe; munda mwane muli mbabazio, nu mutima wane guli na kabebe kubuno nakusombile nunse. Kumbuga mwene wa nganda ukwita bantu, nu mu numba muli lukuo.
21 “Bongule ku mitongo zane, tondo takuli umozi ukumbibya. Beiti bane bansania bongule ku misagu za kabebe kane, nu babogilebogile kubuno wakitile bubo. Lusia busi bubo buwasambalile, nubo babe bumozi na nne.
22 “Bubi bwabo bunsania buvwe lwabusio lwobe, ee Yehowa, nu ubakitile anga buwankitide ku kabamba ka kwaga kwane kunsania. Mitongo zane zili mingi, nu mutima wane watamba nunse.”