EZEKIELI
Lutanuno lwa Mukota lwabasila Ezekieli
1
1 Ku bindi bitano bya mwezi w'inazi wa mwaka makumi masatu ganabezaga ku mutili wa Kebari, munkatini mwa bakobe, igulu lyakandukile nu namonine ku tulolesio twa Kalaga. 2 Ku bindi bitano bya mwezi, ku mwaka w'itano wa kwigibwa kwa mukota Yoyakini, 3 iyuki lya Yehowa lyatendile ku Ezekieli, sankoga, mwana wa Buzi, mu kisi kya baKaldea, ku luuzi lwa Kebari; nu abede gago mu magala ma Yehowa. 4 Nu ganalolile, namonine kisoa kikutuka ku lulenge lwa kwikazi, nu nembe za keiya zikupupa nako nako mu kimpa kinene, nu kyengi kikali kyasanine kunsania; munkatini mwakyo mwabezaga kisusania kya kyuma kili munkatini mwa keiya. 5 Nu munda mwakyo namonine bisusania bya bibumbwa binazi bili na kalamo. Nu kumoneka kwa byo kwabezaga anga mubili wa muntu. 6 Nakyo nakyo na kyabezaga na bilungi binazi. 7 Byabezaga na magulu meisa; byondo byabyo byabezaga anga bisusania bya byondo bya kyana kya ngombe, byasanine anga nsubi zasugwa busoga. 8 Nu byabezaga na maboko ma muntu ku ndenge zabo inazi. Bibyo binazi byabezaga na bilungi nu byupi. 9 Byupi byabyo byabezaga byakulumana. Mu kwenda tabyagalukaga tondo nakyo na kyendaga kyalolela ku lwabusio. 10 Nu bilungi byabyo byabezaga anga bubo. Nakyo na kyabezaga na bilungi binazi, kilungi kimozi kya muntu, kimozi kya kimbwe ku seidume, nu kimozi kya ngombe ku seikazi, nu kingo kimozi kya ndiu. 11 Bubuno u bwabezaga bilungi byabo. Byupi byabyo byabezaga byemana mu mpena; nakyo na kyabezaga na byupi bibili bya landana na bya munyage, nu bingo byupi bibili byakukide mibili zabyo. 12 Nakyo na kyendile kyemana lwabusio lwakyo. Byendile anga bwabisingaga muuza; tabyagalukile.
13 Nu kumoneka kwa bibumbwa kwabezaga anga kugulumina kwa makangania aba ngulumina za kasuku, keiya kasanine nako nako munkatini mwabyo. Keiya kasanine nunse nu mikenzi zabasile mu keiya. 14 Bibumbwa bibino byendaga lubilo nu kusubya anga kukelima kwa mikenzi.
15 Nu ganalolile ku bibumbwa bibino binazi, namonine kubyo, nakyo na kyabezaga na kyabilingana ku ntungo kwakyo. 16 Lukita lwa kumoneka kwa bya bilingana lwabezaga anga makozi ma bukunza bunene makukelima makumanwa zabarajadi. Bibyo binazi byabezaga byasusanania; nu kumoneka kwabyo nu mulimo wabyo wabezaga anga kyabilingana munda mwa kyabilingana. 17 Nkungu zibyendile, byendile ku lulenge lumozi lwa zezo inazi geteli kugaluka. 18 Byabilingana byabezaga bya kuganiagania nu kyabilingana kyabezaga na meiso ku ntungo kwakyo. 19 Nu bibumbwa bibyo gabyendaga, byabilingana byendaga gamozi nabyo, nu bibumbwa bibyo ndi byasakikwa, byabilingana nti byasakikwa nubyo. 20 Na lulenge nalwatundaga kwenda muuza, nti bibyo byenda. Nu byabilingana byazanzwidwe mu ntungo nabyo, kubuno muuza wa bibumbwa bibyo wabezaga munda mwa byabilingana. 21 Nu gendaga bibumbwa, nti bibyo byendaga nubyo; gemanaga bibumbwa, bibyo byemanaga nubyo, nu gazanzukile bibumbwa, nti byabilingana byazanzukile gamozi nabyo, kubuno muuza wa bibumbwa wabezaga mu byabilingana.
22 Nu gantata matoe ma bibumbwa kwabezaga kisusania kya mpelela, anga kiyolo kikukelima. 23 Nu kunsi kwa mpelela kwabezaga byupi byasakama nakyo na kyalandana na kingo, nu bingo bibili byakukila mubili. 24 Nu gabyendaga nungule ku muzumio wa byupi wabezaga anga kubila kwa kela kanene nu anga iyuki lya Mwiya Mayombo, aba anga kazege k'iyombo inene. Gabyemanine, byagezizie byupi byabyo. 25 Nungule ku iyuki gantata mpelela zabezaga gantata matoe mabyo, gabyemanine byagezizie byupi byabyo.
26 Nu gantata ga mpelela zabezaga gantata matoe mabo, kwamonekile kisusania ky'ikozi lya bukunza bunene lyamanagwa yakuti-samawi, kyakitilwe ku kisusania kya kisumbi kya bukota, nu gantata binsania ga kisumbi kya bukota gabezaga kisusania kya muntu. 27 Kutukila ku kibunda nu kwenda ku ntata wozo abezaga asusania nsubi zasugwa busoga nunse, nu kisusania kya keiya kyamutimbile. Nu kutukila mu kibunda nu kwenda gansi namonine kisusania kya keiya, nu kyengi kikali kyamutimba. 28 Nu kyengi kikyo kyasusanizie kumoneka kwa lutanuno lwa Yehowa. Ganamumonineko nagwede bukukama, nu nungule ku iyuki lya umozi watendile.