Kumanwa kwa Ezekieli
2
1 Ambwide bunee: “Uwe mwana wa muntu, emana nu nitende nobe.” 2 Muuza wingide mundi nkungu zatendaga na nne, nu anemanizie. Nungule wozo watendaga na nne. 3 Ambwide bunee: “Uwe mwana wa muntu nakusinga ku bantu ba Israeli, ku kilongo kya baguni bansombile, bo nu beisibo banagide aaba nu lelo. 4 Nubo beli na kabenga nu tabeli na lwanzo; nakusinga kubeli nu uwe wababule bunee: ‘Yehowa, Mwiya Bwangato Bunsania akutenda bubuno.’ 5 Nu bo ndi bakungwilila aba ndi tabakungwilila (kubuno babo beli numba za kuguna) bamenye buno mulengania eli munkatini mwabo. 6 Uwe mwana wa muntu, ntubakue boba, aba ntukue moki mabo boba, aba mikele nu mingilingili ndi zili gamozi nobe nu ndi wikala munkatini mwa nkutu, ntukue moki mabo boba. Aba ntuzangezange lwabusio lwabo kubuno beli numba za kuguna. 7 Ukababula moki mane, ndi bongwilila aba ndi tabongwilila, kubuno babo beli baguni nunse. 8 Tondo uwe mwana wa muntu, ungwilila ku bunkukutenda. Ntugune anga zeno numba zikuguna; asula kanua kobe nu lia binkukukasa.”