Ezekieli alisibwa Mukanda
3
1 Ambwide bunee: “Uwe mwana wa muntu, lia kiwasanga, lia kigondi kya mukanda kikino nu enda, tenda na numba za Israeli.” 2 U bubo naswide kanua kane, nu andisizie kigondi kya mukanda. 3 Ambwide bunee: “Uwe mwana wa muntu, lia kigondi kya mukanda nu kwembuka nako.” U bubo nakilide nu kyabezaga nse mu kanua kane anga buuki. 4 Ambwide bunee: “Uwe mwana wa muntu, enda ku numba za Israeli nu kubabula moki mane. 5 Kubuno ntwasingwa ku kilongo kya ungo mutendezi aba mutendezi mubibu, tondo ku numba za Israeli. 6 Nsyakusinga ku babilongo bili na ungo mutendezi aba mutendezi mubibu nu moki mabo tamakusongololwa. Tondo nakusinga ku babo banakungwilila. 7 Tondo numba za Israeli tazikakungwilila kubuno tazikuziga kunnungwilila. Kubuno numba insania za Israeli bakanda malanga nu beli na mitima mibibu. 8 Kilungi kyobe kikaba kibibu anga kyabo nu malanga mobe makaba mabibu anga mabo. 9 Malanga mobe makaba mabibu anga buli isangabwe ibibu kutinga mango makozi, ntubakue boba aba ntuzangezange lwabusio lwabo, kubuno beli baguni.”
10 Lingo ambwide bunee: “Uwe mwana wa bantu, ungwilila busoga binsania binakutenda nu kubilanga mu mutima wobe. 11 Tuka, wende ku bakobe, mibuto zobe nu kubatenda bunee: ‘Bubuno u bukutenda Yehowa, Mwiya Bwangato Bunsania,’ ndi bakungwilile aba ndi banane.”
12 Nu Muuza wanzanzwide nu nungule ku kazege kakali kumbusa kwane nu kutenda bunee: “Mbogimbogi ku kabamba ka lutanuno lwa Yehowa mu kiziki kyage.” 13 Nungule ku muzumio wa byupi bya bibumbwa nu kuzumia kwa byabilingana muntungo mwabyo kwabezaga anga kaningini kanene.
14 Nu Muuza wanzanzwide nu kuntikya: nendile na lubaba mu mutima wane anga keiya nu magala ma Yehowa mandangile. 15 Nabasile ku bakobe beikalaga ku mutili wa Kebari ku Teli-Abibu nu nangamine nunse ku bindi mutubakamo.
Ezekieli abikwa mulangi
16 Nu kuzinda kwa bindi mutubakamo, iyuki lya Yehowa lyatendile bunee: 17 “Uwe mwana wa muntu nakubikile mulangi wa numba za Israeli, ndi wungwa ku iyuki lyane nti wasasia kulibasia kubeli. 18 Ndi nabula mwagi bunee: ‘Lebelebe ukukua’ nu uwe ntwamutonda kutuka mu nzila mbi buno eiyonie nu ndi akua mu bwagi bwage nti katati ka mikila zage keli kobe. 19 Tondo kungwa watonda mubi nu we ntagaluka kutuka ku bubi bwage aba kutuka ku nzila zage za bwagi nti akue mu bwagi bwage; katati ka lukuo lwage nti katuka kuguli. 20 Ndi wisanana agaluka mu kwisanana kwage nu kwaga, nu nabika kyakumugusia mu nzila zage nti akua. Akua mu bwagi bwage kubuno ntwamutondile nu bwisanana bwakitile tabukakengelwa lingo, tondo katati ka lukuo lwage kakaba kuguli. 21 Ndi watonda wisanana ku bwagi nu ntaga, akalama kubuno eitabizizie kutenda kwobe, nu uwe wiyonia.”
Ezekieli aba kaluma
22 Nu kuboko kwa Yehowa kwabezaga kundi nu antendile bunee: “Zanzuka, wende ku kisi kyabota nu natende nobe kuko.” 23 Ububo nazanzukile nu nendile ku kisi kyabota nu gago namonine lutanuno lwa Yehowa lwabezaga anga lunamonineko ku mutili wa Kebari; nagwede bukukama.
24 Ububo Muuza eingide mundi, anemanukizie ga magulu mane nu atendile na nne nu kumbula bunee: “Enda, wiyigale mu numba zobe. 25 Tondo uwe mwana wa muntu, bakakukanda na mizigi buno ntuvwame kwenda munkatini mwabo. 26 Nalandanie lulami lwobe na kyangangu; wabe kaluma; ntwavwame kubazugila lingo kubuno beli numba za kuguna. 27 Tondo ku nkungu zinkatenda nobe nkalimbula kanua kobe nu ukababula bunee: ‘Yehowa, Mwiya Bwangato Bunsania atenda bubuno.’ Wozo ukungwa ongwe, nu wozo ukusomba asombe, kubuno babo beli numba za kuguna.”