Bulengania bwa kuzika kwa Yerusalema
4
1 Nu atendile lingo bunee: “Uwe mwana wa muntu, tola ibiliki inene nu kita kalolesio ka mwino wa Yerusalema kulyo, 2 Ugutimbe na ngabo nu kusakamia bilongo anga nkangamo nu timba mwino na bibombo bya bantu kugusia kitutu mu ntungo insania. 3 Nu wimike luginga lwa kyuma anga kitutu gamusamba na mwino, nu lola kulo. Nu uwe wagutimbe na bita, kakano kabe kalolesio ku numba za Israeli. 4 Wiyombeke kongata ku lulenge lwa ku seikazi nu bika lusungio lwa numba za Israeli gantata gobe. Anga geigezye bindi biwiyombeka kulo, ukeeka lusungio lwabo. 5 Nu nkakuganzila bindi bigezye na myaka za bwagi bwabo, bindi nkama isatu nu makumi mubula: Ububo buukeeka bwagi bwa numba za Israeli. 6 Nkungu ziwazindilizie bitondo bibino nti wiyombeka kongata ku lulenge lwa ku seidume; weeke bwagi bwa numba za Yuda; naganzile kuguli bindi makumi manazi, kindi kimozi ku mwaka umozi, anga bunakulagile.
7 Walole ku ngabo zatimba ku Yerusalema nu kuboko kwobe takwakukilwa na nsulu nu walenganie kugo. 8 Nu nakukande na mizigi buno ntwigalukye ku lungo lulenge aba gawazindilizie bindi bya bita.
9 Tola ngano nu mumpunge nu bisimbo nu ndengu nu biguma, bisambike mu nyungu nu kukita anga kampampa. Ukabilia geigezye bindi biwiyombeke kongata ku lulenge lwobe, bindi nkama isatu nu makumi mubula. 10 Nu idia liwalie lyabe lyobe ku kilindiko kya shekeli makumi mabili a busi na busi; walie nkungu na nkungu. 11 Wanue kyindi kimozi kya mutuba kya hini b kya mazi nu wanue nkungu na nkungu. 12 Ukalilia anga tumpampa twa mumpunge nu kutuyika lwabusio lwabo na keiya ka tubi twa muntu. 13 Yehowa atenda bunee: ‘Ububo bukalia bantu ba Israeli idia lyabo lya nsese munkatini mwa bilongo ku kiziki na kiziki kinkabapumbia.’”
14 Ububo natendile bunee: “Ee Yehowa, Mwiya Bwangato Bunsania, nsyabigizibwe kubuno kutukila bwana bwane aaba nu kano kaluma nsyalide nyama zidekanina aba zakua n'ingo nyama aba nsese.”
15 Ububo ambwide bunee: “Kasi nitabizia tubi twa ngombe mu kiziki kya tubi twa muntu, nu kulongeka idia lyobe nato.” 16 Kumbusa atendile kundi bunee: “Uwe mwana wa muntu natikya kilemanizio ky'idia mu Yerusalema nu balie idia lyalindikwa, nu kunua mazi malindikwa, nu bangame. 17 Beiyanine idia nu mazi nu bakangama bwabo bwabo nu konda ku kabamba ka bwagi bwabo.”