EZEKIELI 5

1 Nu atendile lingo bunee: “Uwe mwana wa muntu kata mwene wa nganda anga kakengo kakali nu kwibega itoe nu luzelu, kumbusa tola kilindiko nu kubegania nzwili. 2 Gasile bindi bya bita nti wagisia kyindi kimozi kya bisatu kya nzwili mu keiya munkatini mwa mwino, kingo kimozi kya bisatu nti wakikoka na mwene wa nganda bweta mwino nu kyindi kimozi kya bisatu kukibalangania ku lumpumpu; nkabasia mwene wa nganda mu musagi nu kubeita. 3 Tondo langa nkindi zazo lingo nu kuzikanda ku lupambu lwa nsulu zobe. 4 Nu nti watola nkindi zazo lingo nu kuzisa mu keiya, nu keiya katuke kuzo nu kubasa kunsania ku Israeli.

5 Yehowa, Mwiya Bwangato Bunsania akutenda bunee: ‘Wono u Yerusalema, nagubikile munkatini mwa bilongo nu bisi byagutimba. 6 Nugo ukuguna milembe zane nu makakizio mane.’ 7 Bubo u bukutenda Yehowa, kubuno wananine kutinga bingo bilongo byakutimba, ntwendile mu milembe zane aba kwanza makakizio, aba kwanza milembe za bilongo byakutimba. 8 Bubo u bukutenda Yehowa, Mwiya Bwangato Bunsania, nalolela kuguli na bita nu nkakusungia lwabusio lwa bilongo. 9 Ku kabamba ka mibi zeinyu insania nakita munkatini mweinyu bunsikitaga lingo. 10 Ku kabamba kakano beisi ba bana balie bana babo munkatini mweinyu, nu bana balie beisibo; nu nabike lusungio munkatini mweinyu nu bakusigala kulo nababalanganie na lumpumpu.

11 Ku kabamba kakano, anga bunkulama, Yehowa, Mwiya Bwangato Bunsania akutenda, lebelebe kubuno wabigizie kiziki kyane kyasililila na bitondo byobe bya nkisi nu bwagi, kubuno nakugezizie, aba liso lyane talyasigilile aba nsyabe na kyombo 12 Kyindi kimozi kya bisatu kikakua na lusambo lubibu nu nzala nkali munkatini mweinyu; kyindi kimozi kya bisatu kikakua na mwene wa nganda, nu kyindi kimozi kya bisatu kyabalanganibwe ku ndenge inazi za kisi, nu kumbusa nkabasia mwene wane wa nganda nu kubeita. 13 Bubo bongoa bwane bwazindilile nu bwakuka kubeli, nu nne nabibibwe; nubo bamenye buno nne Yehowa natendile mu lugi lwane, ganazindilizie bongoa bwane kubeli.

14 Ukaba bukindu nu kiswililo munkatini mwa bilongo byakutimba, nu lwabusio lwa bansania bakutinga. 15 Ukaba kiswililo nu kwililikwa, iyano nu masisi ku bilongo byakutimba, gankakusungia na bongoa bwane bukali nu kasusula kane kakali, nne Yehowa nabutenda.

16 Nkungu zinasinge nzala nkali anga misungu za kuzikya, nu nzala zikaba nkali nunse kuguli nu kwita kilemanizio kyobe ky'idia. 17 Lingo nkakusingila nzala nu nyama nkali nu zikeita bana bobe. Lusambo lukali nu mikila zikagela munkatini mwobe nu nkakulusizia mwene wa nganda, nne Yehowa nabutenda.”