6
1 Nu iyuki lya Yehowa lyatendile bunee: 2 “Uwe mwana wa muntu lolela ku lulenge lwa miduko za Israeli nu lengania kuzo iyuki lya Yehowa, Mwiya Bwangato Bunsania, bunee: 3 ‘Miduko za Israeli, ungwililazi iyuki lya Yehowa, Mwiya Bwangato Bunsania, akutenda bubuno, ku miduko, nkangamo, mpinga nu bibitabita, nne nkabasa kumuli na mwene wa nganda nu nkazikya biziki byeinyu byasakama. 4 Nu tuyulo tweinyu twabe bukindu nu tuyulo tukabunguka nu nkagusia bakuzi beinyu lwabusio lwa nkisi zeinyu. 5 Nabike bitumba bya bantu ba Israeli lwabusio lwa nkisi zeinyu nu nkabalangania makwa meinyu mansania ku ndenge insania za tuyulo tweinyu. 6 Miino za kisi kyeinyu kinsania zikazikibwa, biziki byeinyu byasakama bikaba bukindu, nu tuyulo tweinyu tukabalanganibwa nu kuzika, nu nkisi zeinyu zikabugibwa nu kuba bulia. Nu tuyulo tweinyu twa bulago tukaseswa nu milimo zeinyu zikazikibwa. 7 Babo beitilwe bakagoa munkatini mweinyu nu mukamenya buno nili Yehowa. 8 Nkasiga bamozi kumuli kubuno kukaba bamozi bakatina mwene wane wa nganda munkatini mwa bilongo, gamukabalanganibwa mu bingo bisi. 9 Nu babo batina munkatini mweinyu bakakengela kiziki kibekilwe ku bukobe, buni bunababedwe na butazi bwa mitima zabo zansigile, nu bwa meiso mabo mabongilwe na nkisi zabo. Bakeisomba nunse ku kabamba ka mibi zibakitile nu ku misako zabo mibi insania. 10 Bakamenya buno nili Yehowa, nu kutenda kwane takwabezaga bulia ganamutendile buno nkamubasizia bitondo bibino bibi.
11 Yehowa, Mwiya Bwangato Bunsania, atenda bunee: “Tuta nkasa, nu zumia nkindo, nu kutenda bunee: ‘Kabebe!’ ku kabamba ka mibi nu misako insania mibi za numba za Israeli, zikakua na mwene wa nganda, ku munganda nu lusambo lukali. 12 Wozo uli bulazi akakua na lusambo lunene, wozo uli bwigi akakua na mwene wa nganda, ukasigala nu kutimbwa, nu akakua na munganda. Ububo nkazindilizia bongoa bwane kubeli. 13 Mukamenya buno nili Yehowa, gamukamona ku bitumba bya babo basesilwe byatimba ku ndenge insania za nkisi zabo, nu tuyulo twabo, gantata nkangamo insania, nu gansina muti na muti wa mwalo munene, biziki bibakasanaga tuyulo twa nsunu nsoga ku nkisi zabo insania. 14 Nkabazikya na magala mane nu kisi kyabo kikaba bukindu anga kalula bwigi na Dibla, nu bakamenya buno nili Yehowa.”’”