Lusungio luse bwigi
7
1 Yehowa atendile lingo bunee: 2 “Uwe mwana wa muntu, u bukutenda Yehowa, Mwiya Bwangato Bunsania, ku kisi kya Israeli. Kuzinda kuse bwigi ku ndenge inazi za kisi. 3 Kano kaluma kuzinda kuli kuguli nu nne nakusungie na bongoa bwane, nakusungie anga geigezye makitilo mobe; nabike katati ka misako zobe mbi kuguli. 4 Nsyakusigilile aba nsyakukwile kyombo. Nabike katati ka misako zobe kuguli nu mwamenye buno nili Yehowa. 5 Yehowa, Mwiya Bwangato Bunsania, atenda bunee: ‘Kabebe keitalikila gantata kango. 6 Kuzinda kuse bwigi; kuse bwigi kukubasila, lola kavwa. 7 Lusungio lwobe lwakubasila, uwe mwana wa muntu wa kisi. Nkungu zika, busi buse bwigi, kuli kulaluka kwa mbogimbogi gantata mwiduko. 8 Kano kaluma ku nkungu nkeke nakongelwe, nazindilizie bongoa bwane kuguli. Nakusungie anga buli makitilo mobe mansania ma nsese mawakitile. 9 Nsyakusigilile nu nsyakukwile kyombo. Nakusungie anga buli makitilo mobe ma nsese, malolesibwa bwasibwasi, nu mwamenye buno nne Yehowa, u wakita bubo.
10 Busi bubo bwika, lusungio lwabasa, bwagi bwobe bwakolama anga iduba, nu lwikotio lwobe lwasanuka anga iduba. 11 Bwiti bwobe bwabede kasusula ka bwagi; ta umozi wasigale munkatini mwabo, aba bwingi bwabo, aba bugumi bwabo, aba kimozi kinene takyabe munkatini mwabo. 12 Nkungu zika, bubo busi bwakya; wozo ukukunza ntabogeboge, aba wozo ukukunzia ntalile, kubuno bongoa buli ku babo bansania. 13 Wozo ukukunzia ntamone kampa ku bibyo byakunzizie mu kalamo kabo, kubuno bulengania bwatendilwe ku babo bantu tabunagaluka, ku kabamba ka bwagi bwabo, takuli umozi ukeiyonia.
14 Bide monze, tondo ta wampa wende ku bita, kubuno bongoa bwane buli ku bansania. 15 Mwene wa nganda guli kumbuga kwa mwino, lusambo lukali nu munganda bili mu mwino. Babo beli mu isoa bakue na mwene wa nganda nu beli mu mwino bazikibwe na munganda nu lusambo lukali, bansania. 16 Ndi bamozi batina nu kwenda ku miduko anga nkulimba za bibitabita, gago nkabeita nawe nawe ku kabamba ka bwagi bwabo. 17 Maboko mabo mansania makoloboke nu mazu mabo matambe anga mazi. 18 Bakavwala makunino nu kugilimina nunse na boba, nu babe na nsoni nu kululwa mimpugu ku matoe mabo.
19 Beise feza gansi mu nzila nu olo zabo zabe kubeli anga kintu kili na nsese. Feza zabo nu olo zabo tazinavwama kubonia ku busi bwa bongoa bwa Yehowa. Tazikutie mitima aba kwembukya nda zabo, kubuno zabezaga anga ikozi lyakukikitania. 20 Beikotizie na bintu byabo bya malebo bya bukunza bukali, bakitile nabyo bisusania bya nkisi. Ku kabamba ka bubo nabibike kubeli anga bintu bibi. 21 Nabikasane anga ntiko za bageni nu za banyagi ba kisi nu babibenge. 22 Nsyalole kubeli lingo nu babigie kiziki kyane kyasililila, banyagi beingile mukyo nu kukibigia.
23 Kita kikando kubuno kisi kiyala na babo bakubasia mikila nu mwino wiyala na bwiti. 24 Ububo nasinge bilongo bibi nunse nu beikale mu numba zeinyu. Nu nasile lwikotio lwa beiya magala nu biziki byabo byasililila byabigibwe. 25 Gavwe muziko, balonde bubobelelo tondo tabwamoneke. 26 Kabebe keitalikila gantata ga kango nu musagu mubi witalikila ku ungo; balonde kalolesio ku mulengania, tondo tabeigisibwe mulembe na basankoga, tabamone lwango ku basondelezia. 27 Nu mukota alile nu mitonge zabe mu kabebe, maboko ma bantu ba kisi magilimine na boba. Nabakitile anga buli makitilo mabo. Nabasungie anga bubatunganana kusungibwa, nu bamenye buno nili Yehowa.’”