Kalolesio ka bwagi bwa Yerusalema
8
1 Ku kindi kya bitano kya mwezi wa mutuba mu mwaka wa mutuba,a ganabezaga nikili mu numba zane na bakulu ba Yuda, magala ma Yehowa, Mwiya Bwangato Bunsania, mambaside kitangalabesi. 2 Nalolile nu namonine ku kisusania kya muntu, kutukila gansi nu ku kibunda kyage kwabezaga keiya. Nu kutukila ku kibunda nu ku itoe kwasanaga anga kyengi kya mukenzi. 3 Kisusania kya kuboko kyalambizibwe kundi nu kunkata ku nzwili z'itoe lyane. Muuza ansakikile gasamba igulu nu kisi nu anekile ku Yerusalema mu kalolesio ka Kalaga; nu ambikile gansi ga lwibi lwa munda lwalolela ku lulenge lwa kwikazi gago geikalaga nkisi zalusagia lugi ku Kalaga. 4 Nu gago gabezaga lutanuno lwa Kalaga wa Israeli anga lutanuno lunamonine kulo ku kibitabita. 5 Ambwide bunee: “Uwe mwana wa muntu, tambia meiso mobe ku lulenge lwa kwikazi.” Ububo natambizie meiso mane ku lulenge lwa kwikazi nu namonine ku lwibi lwa kayulo; kwabezaga nkisi zezo zayukizie lugi lwa Yehowa ku mwingilo.
6 Ambuzizie bunee: “Uwe mwana wa muntu ndi ukumona bubakukita, misako mibi minene zikukita numba za Israeli, buno nibe bulazi na kiziki kyane kyasililila? Tondo ukamona ku ingo misako mibi zatinga.” 7 Ansondelezizie ku mwingilo wa mulungu nu ganalolile, namonine ku itengu mu kitutu. 8 Ambwide bunee: “Uwe mwana wa muntu, botola kitutu.” Ganabotwede kitutu, namonine ku mwingilo.
9 Ambwide bunee: “Ingila, umone ku misako zibakukita gano.” 10 Ganingide, namonine ku tulolesio twa nkita ningi za nyama nu bizimu bikugelegeta, nu nzoka, ku bitutu binsania nu nkisi insania za numba za Israeli. 11 Nu bakulu makumi mutubakamo ba numba za Israeli bemana lwabusio lwabyo nu Yazania, mwana wa Safanu, emana munkatini mwabo, nawe na wabezaga na nyungu za kugisia bulago mu kuboko kwage, nu nsunu za bulago zabalangenne.
12 Ububo Yehowa ambwide bunee: “Uwe mwana wa muntu ndi ukumona buni bukukita bakulu ba numba za Israeli mu kapilo, nawe mu busio bwa nkisi zage? Bakutenda bunee: ‘Yehowa ntakutumonako, asigile kisi.’” 13 Ambwide lingo bunee: “Wamone ku mango makitilo mabi nunse kutinga mamano.”
14 Ububo ansondelezizie ku mwingilo wa numba za Yehowa walolela ku lulenge lwa kwikazi nu ku bakikulu beikalaga gago bakulilila kalaga Tamuzi. 15 Ububo ambuzizie bunee: “Uwe mwana wa muntu, ndi wamona ku bibyo? Wamone lingo ku bubi bunene kutinga bubuno.”
16 Ansondelezizie ku mulungu wa munda mwa numba za Yehowa nu ga mwingilo wa numba za Yehowa; nu gasamba lusu nu kayulo, namonine ku bamulume makumi mabili nu batano, beida migongo zabo ku numba za Yehowa nu balolela ku lulenge lwa kuntata nu kukumbamina musi ku lulenge lwa kuntata.
17 Nu ambwide bunee: “Uwe mwana wa muntu ndi wamona ku bibino? Ndi tabwakuka ku numba za Yuda kwikasana ku misako mibi zibakukita gano? Tondo beizazia kisi na myango nu banongia lingo. Wamona bubakukita tuti ku myembe zabo. 18 Nabasungie na bongoa bwane, nsyabasigilile aba kubakwila kyombo, aba banalila bubibu ku matuzi mane, nsyabongwilile.”