Kuzikibwa kwa bagi
9
1 Alalukile n'iyuki inene nu atendile bunee: “Vwazi inyuwe bakakizizibwe ku kuzikya mwino, nawe na ngabo zage mu kuboko kwage.” 2 Namonine ku bantu mutuba bavule kutuka ku nzila za lwibi lwalolela ku lulenge lwa kwikazi, nawe na ngabo zage mu kuboko kwage. Muntu umozi abezaga emana munkatini mwabo avwalikibwa nsulu za kitani zenga nunse nu bibyo bya kusanza mu kibunda kyage. Beingide nu bemenne mu ntungo mwa kayulo ka nsubi. 3 Lutanuno lwa Kalaga wa Israeli lwabezaga lwemana kutukila kerubi nu kubasa ku kitiko kya numba. Yehowa amanine muntu wozo wabezaga wavwala nsulu za kitani zenga nunse, nu bya kusanza mu kibunda. 4 Amubwide bunee: “Tinga munkatini mwa mwino wa Yerusalema, nu bika kakengelezio ku malanga ma bantu bakulila nu bakutonga ku kabamba ka makitilo mabi mabakukitaga munkatini mwabo.”
5 Nungule bwatendile Yehowa ku bango bunee: “Tinga kunsania mu mwino kumbusa kwage nu kuguzikya. Tamusigilile aba kukua kyombo. 6 Itazi bansania, bamulume, bakungu, basikila, bakinga nu bakikulu tamwitubye ku muntu uli na kakengelezio kako. Lingilazi ga kiziki kyane kyasililila.” Ububo balingile na bakulu babezaga lwabusio lwa numba za kukumbamina. 7 Ababwide bunee: “Bigia numba nu izaziazi mulungu na bitumba. Mwendazi.” Batukile nu kwita aba kuzikya bantu kunsania mu mwino.
8 Nkungu zibeitile bantu, nasigede. Nagwede bukukama nu kulila nu natendile bunee: “Ee Yehowa, Mwiya Bwangato Bunsania, ndi ukuzikya bansania basigala mu Israeli ku nkungu ziukongelwa Yerusalema?”
9 Ambwide bunee: “Bwagi bwa numba za Israeli bwitila nunse, kisi kiyala na bwiti nu mwino walubikana kubuno bakutenda bunee: ‘Yehowa asigile kisi nu ntakumona ku kampa.’ 10 Nu nne nsyabasigilile aba kubakwila kyombo tondo basungibwe ku kabamba ka misako zabo.”
11 Nu muntu wavwalikibwa nsulu zenga nunse nu abezaga na bibyo bya kusanza mu kibunda kyage asambede bunee: “Nakitile anga buwankakizizie.”