Kalolesio ka lutanuno lwa Mukota.
10
1 Namonine mu mpelela gantata matoe ma makerubi, kisusania ky'ikozi lya yakuti-samawi lya bukunza bukali. Lilyo lyabezaga anga kisumbi kya bukota lyamonekaga gantatamo. 2 Yehowa atendile ku wozo muntu wavwalikibwa nsulu za kitani zenga nunse bunee: “Ingila gasamba byabilingana byili kunsi kwa makerubi nu kwizazia maboko mobe na makangania mawatikye gasamba makerubi nu kumabalangania kunsania mu mwino.” Namonine kwingila kwage. 3 Gemenne wozo muntu, makerubi memenne ku lulenge lwa kwidume nu kimpa kizazizie mulungu wa munda. 4 Lutanuno lwa Yehowa lwazanzukile kutuka ku makerubi nu kubasa ku kitiko kya numba za kukumbamina; numba ziyede na kimpa nu mulungu wiyede na kusana kwa kyengi kya lutanuno lwa Yehowa. 5 Muzumio wa byupi bya makerubi wungulweko bulazi wabezaga anga iyuki lya Kalaga, Mwiya Mayombo. 6 Yehowa akakizizie muntu wavwalikibwa nsulu za kitani zenga bunee: “Tikya keiya keli gasamba byabilingana nu keli gasamba makerubi,” eingide nu kwemana bwigi na kyabilingana kimozi. 7 Kerubi alambizie kuboko kutuka gasamba makerubi ku keiya kabezaga gamesamba, atikizye kuko nu kubika mu maboko ma wozo wavwalikibwa nsulu za kitani zenga nunse, akatile nu kutuka. 8 Nu namonine kunsi kwa byupi bya makerubi kisusania kya kuboko kwa muntu.
9 Ganalolile, namonine ku byabilingana binazi bwigi na makerubi, kyabilingana kimozi bwigi na kerubi kimozi, nu byabilingana byakelimaga anga ikozi lya malebo likumanwa zabarajadi. 10 Nu kumoneka kwa bibyo binazi kwabezaga bumozi. Kyabezaga kyabilingana na kimozi munda mwa kingo. 11 Nkungu zibyendaga, byendile ku lulenge lumozi geteli kugaluka, nu ku kyenda kyalolesia itoe nti u ku kyenda; takigaluke. 12 Mibili zabyo insania, maboko mabyo nu mugongo nu byupi byabyo nu byabilingana byabezaga biyala na meiso kunsania nu na kerubi na kyabilingana kyage. 13 Nungule ku kumanwa byabilingana bikutimbatimba. 14 Nakyo na kyabezaga na bilungi binazi; kimozi kyabezaga na kilungi kya kerubi, nu kya bibili kilungi kya muntu, kya bisatu kilungi kya kimbwe nu kya binazi kilungi kya ndiu.
15 Nu makerubi malengile. Meli bibumbwa binamonine kubyo ku mutili wa luuzi Kebari. 16 Nu nkungu zendile makerubi byabilingana byendile mu ntungo mwamo, nu nkungu zimalambizie byupi kulenga, byabilingana tabyatukile bwigi namo. 17 Na gemenne kerubi nti byabilingana byemana nubyo, na kwalengaga kerubi nti byabilingana byenda gamozi namo, kubuno muuza wa bibumbwa bikulama wabezaga mu byabilingana.
18 Lutanuno lwa Yehowa lwatukile ku kitiko kya numba za kukumbamina nu lwagubatide makerubi. 19 Nkungu zinamalolaga, makerubi mapupizie byupi byamo nu kulenga nu byabilingana byabezaga ku ntungo kwamo. Memenne ga mwingilo walolela ku lulenge lwa kuntata lwa numba za Yehowa. Lutanuno lwa Kalaga wa Israeli lwagubatide gantata gamo.
20 Nu bibyo byabezaga bibumbwa binamonine kunsi kwa Kalaga wa Israeli ku mutili wa Kebari. Ububo nasongolede buno bili makerubi, 21 nakyo nakyo na kyabezaga na bilungi binazi nu byupi binazi, nu kisusania kya maboko ma muntu kyabezaga kunsi kwa byupi byabyo. 22 Lukita lwa bilungi byabo lwabezaga bumozi anga lunamonineko ku bibyo byabezaga ku mutili wa Kebari. Nakyo na kyendile kyemana lwabusio lwakyo.