Bulengania bwa kusungibwa kwa bakota ba Israeli
11
1 Lingo Muuza wantikizye nu kwenda ku lulenge lwa lwibi lwa kuntata lwa numba za Yehowa. Nu gago gabezaga bantu makumi mabili ga mwingilo. Namonine munkatini mwabo ku Yazania, mwana wa Azuri, nu Pelatia, mwana wa Benaya, basondelezia ba bantu. 2 Nu Muuza ambwide bunee: “Uwe mwana wa muntu babo beli bantu bakulongeka bubi nu kukita nango mbi mu mwino wono. 3 Bakubuzia bunee: ‘Ndi nkungu zakobaka numba tazika? Mwino wono guli anga nyungu nu iswe tuli anga nyama.’ 4 Ububo lengania kubeli, uwe mwana wa muntu, lengania.”
5 Muuza wa Yehowa wamvwilide nu wambwide bunee: “Yehowa atenda bunee: ‘Bubuno u bumukutenda inyuwe numba za Israeli, tondo bumukukengela nibwizi!’ 6 Mwatalikila bitumba byeinyu mu mwino wono nu nzila zeinyu ziyala nabyo.
7 Kubuno Yehowa, Mwiya Bwangato Bunsania, atenda bubuno: Bitumba byeinyu bimwasiga munkatini mwa mwino bili anga nyama nu mwino wono guli anga nyungu, tondo namutikye mugo. 8 Mwakule mwene wa nganda boba, ububo namubasizie mwene wane wa nganda, u bukutenda Yehowa, Mwiya Bwangato Bunsania. 9 Namutikye munkatini mwa mwino wono nu kumubasia kumbuga, nu namugabule ku bageni nu bamusungie. 10 Mwakue na mwene wa nganda; namusungie ku mwaga wa kisi nu bubo mwamenye buno nne nili Yehowa. 11 Mwino wono tawabe anga nyungu zeinyu aba tawabe anga nyama munkatini mwago. Namusungie mu myaga za Israeli. 12 Ububo mwamenye buno nili Yehowa, kubuno tamwanzile makakizio mane aba tamwakitile milembe zane, tondo mwakitile anga milembe za mpala za bilongo byamutimba.”
13 Ku nkungu zinalenganizie, Pelatia, mwana wa Benaya, akule; ububo nagwede bukukama nu nalilile n'iyuki inene bunee: “Ee Yehowa, Mwiya Bwangato Bunsania! Ndi ukuzikya nunse babo basigala ku baIsraeli?”
14 Iyuki lya Yehowa lyatendile bunee: 15 “Uwe mwana wa muntu, kikanga kyobe nu mibuto zobe, nu banyobe beigizibwe nu numba insania, u babo bansania babwidwe na bantu ba Yerusalema bunee: ‘Endazi bulazi na Yehowa. Kisi kikino kyakasilwe kutuli kukipiena.’ 16 Ku kabamba kakano tenda buno Yehowa, Mwiya Bwangato Bunsania, u watenda bunee: ‘Nabeigizie bulazi munkatini mwa bilongo, nu nababalanganizie mu bingo bisi, tondo nabezaga kubeli anga kiziki kyasililila ku nkungu nkeke ku biziki bibeigizibwe.’ 17 Ububo tenda bunee: ‘Bubuno u bukutenda Yehowa, Mwiya Bwangato Bunsania, bunee: “Nkamukungika kutuka ku bilongo nu kumukundamania ku biziki bimwabalanganizibwe, nkamukasa kisi kya Israeli.”’
18 Gabakasubya bakatikya bintu bibyo bya nsese nu nkisi insania zakyo. 19 Nkabakasa mutima umozi nu nkabika muuza muto mubeli, nkatikya mutima guli anga ikozi nu kubakasa mutima wa muntu. 20 Buno batabange mu makakizio mane nu kwanza milembe zane nu kuzikita. Ku nkungu zezo bakaba bantu bane nu nne nkaba Kalaga wabo. 21 Tondo nkabasungia anga geigezye makitilo mabo, babo bakuyanga bitondo byabo bibi. U bukubula Yehowa, Mwiya Bwangato Bunsania.”
22 Nu makerubi nu byupi byabo, nu byabilingana byabo byabezaga mu ntungo namo, nu lutanuno lwa Kalaga wa Israeli lwabagubatide. 23 Lutanuno lwa Kalaga lwalengile kutuka mu mwino nu lwagubatide mwiduko guli ku lulenge lwa kuntata kwa mwino.