Nkungu za kwigibwa zika
12
1 Iyuki lya Yehowa lyavule kundi nu kuntenda bunee: 2 “Uwe, muntu, ukwikalaga munkatini mwa kilongo kya baguni beli na meiso makumona tondo tabakumona, beli na matuzi makungwa tondo tabakungwa, kubuno babo beli kikanga kya baguni. 3 Uwe, muntu, kana kayikayika bintu byobe bya kwiga nu tuka mu musi ku meiso mabo, embe bakengele aba beli kilongo kya kuguna. 4 Nu nti watola bintu byobe bya kwiga, mu musi lwabusio lwa meiso mabo, nu uwenyene watuke mwigolo lwabusio lwabo anga bantu beigibwa bulazi na kwabo. 5 Botola kitutu ku meiso mabo, nu nti watola bintu nu kubitingiago. 6 Nti wabyeka ku meiso mabo ga matuli mobe nu kubibasia kumbuga mu kindi, nu nti wiziba ku meiso buno unavwa kumona gansi kubuno nakubikile kalolesio ku kikanga kya Israeli.”
7 Nakitile anga bunakakizizibwe; nalusizie bintu byane bya kwiga mu musi nu mwigolo nabotwede kitutu na kuboko kwane, nabasile nabyo kumbuga mu kapilo nu nabyekile.
8 Mu nindunindu iyuki lya Yehowa lyavule kuntenda bunee: 9 “Uwe mwana wa muntu, kikanga kya Israeli, babo baguni, ndi tabakubuzizie buno ukukita kikizi? 10 Babule buno Yehowa, Mwiya Bwangato Bunsania, akutenda bunee: ‘Kalolesio kakano keli ka mukota wa Yerusalema nu kikanga kinsania kya Israeli kili munkatini mwabo.’ 11 Tenda buno nne nili kalolesio ku muli. Anga bunakitile, ububo bukakitwa kubeli, bakenda kwigibwa ku kikando.
12 Nu mukota uli munkatini mwabo akeeka muzigo wage ga kituli, mu kindi abase nu kwenda; bakabotola kitutu, babasie byabo kumbuga, akeikukila kilungi buno meiso mage tamamone kisi. 13 Natege bukila bwane kweli, nu we akatwe mu itega lyane, nu namulusie ku Babeli ku kisi kya baKaldea. Bubo ntakakimonako aaba nu gaakakua. 14 Nu nabalanganie ku mpumpu insania, bansania bamutimba kumukasia nu bibombo byage binsania, nu nkayanga na mwene wane wa nganda kumbusa kwabo. 15 Nubo bamenye buno nne nili Yehowa, nkungu zinababasile munkatini mwa bilongo nu kubabalangania mu kisi kinsania. 16 Tondo nonie bantu bakeke munkatini mwabo na mwene wa nganda nu munganda nu lusambo lukali, buno basambale lusombo lwabo lunsania munkatini mwa bilongo, kiziki kibabase, nubo bamenye buno nne nili Yehowa.”
17 Iyuki lya Yehowa lyambaside lingo nu lyatendile bunee: 18 “Uwe mwana wa muntu lia idia lyobe na kugilimina, nu nua mazi mobe na boba bukali nu kwikongoboteka. 19 Nu tenda na bantu ba kisi bunee: ‘Yehowa, Mwiya Bwangato Bunsania, atenda bubuno ku bantu ba Yerusalema nu kisi kya Israeli; balie idia lyabo na migubogubo, nu banue mazi ku kwangama nunse, kisi kyabo kyabe bukindu ku kwida bintu byabezaga mukyo ku kabamba ka kabenga ka bansania beikile mukyo. 20 Nu miino zili na bantu zakue nu kisi kyabe bukindu, nu mwamenye buno Nne u Yehowa.’”
21 Iyuki lya Yehowa lyavule kundi nu lyantendile bunee: 22 “Uwe mwana wa muntu, musumo mukizi wono u muli nago mu kisi kya Israeli kutenda bunee: ‘Bulazi bwa bindi bwatalikilwa, nu tulolesio tunsania tatwasililila?’ 23 Babule buno Yehowa, Mwiya Bwangato Bunsania, akutenda bunee: ‘Nasila musumo wono aba tabakite nago lingo anga musumo mu Israeli. Ububo babule buno bindi bili bwigi nu kusililila kwa tulolesio tunsania.’
24 Kubuno tulolesio tunsania twa bulia tatwabe lingo aba kulengania kwa kwibikilizia mu numba za Israeli. 25 Nne nili Yehowa, natenda nu kitondo kinatenda kyasililile aba takizizie lingo, kubuno mu bindi byeinyu, inyuwe numba za kuguna, natende kitondo nu kukisililizia, u bwatenda Yehowa, Mwiya Bwangato Bunsania.”
26 Iyuki lya Yehowa lyavule kundi lingo nu lyatendile bunee: 27 “Uwe mwana wa muntu, numba za Israeli zikutenda bunee: ‘Tulolesio tutuno twabe kumbusa kwa bindi byingi nu akusambala misagu za bindi bili bulazi.’ 28 Ku bubo babule buno Yehowa, Mwiya Bwangato Bunsania, atenda bunee: ‘Moki mane tameizizie lingo tamazindilizibwa,’ u bwatenda Yehowa, Mwiya Bwangato Bunsania.”