Kuzugilwa kwa balengania ba buza
13
1 Iyuki lya Yehowa lyavule kundi nu lyatendile bunee: 2 “Uwe mwana wa muntu, lengania ku balengania ba Israeli bakulengania, nu kutenda na babo bakulengania na makengelo mabo bobenyene bunee: ‘Ungwililazi iyuki lya Yehowa. 3 Yehowa, Mwiya Bwangato Bunsania, atenda bunee: “Kabebe ku bikongolo bya balengania bakuyanga mitima zabo bobenyene aba tabamona ku kitondo kinsania. 4 Ee Israeli, balengania bobe beli anga mikala ku biziki byasambukile. 5 Tamwabakamine kwenda ku kiziki kyasambwidwe aba tamwalongekile lingo mikolo ku numba za Israeli, buno bemane busoga ku bita mu busi bwa Yehowa. 6 Bulengania bwa buza nu binsania babimonine buliabulia nu batendile bunee: ‘Yehowa akutenda,’ nu We ntabasingile nu balenganizizie bantu buno kitondo kisililile. 7 Ndi tamwamonine ku tulolesio twa bulia nu ndi tamwalenganizie buza? Mukutenda buno Yehowa ukutenda tondo nsyatendile kampa.”
8 Ku bubo Yehowa, Mwiya Bwangato Bunsania, atenda bunee: “Kubuno mwatendile bitondo bya bulia nu kumona bya buza. Ku kabamba kakano, lolazi, nne namusomba, u bwatenda Yehowa, Mwiya Bwangato Bunsania. 9 Nu kuboko kwane kwabe gantata balengania bakutenda bitondo bya bulia nu kulengania buza. Tababe mu lusu lwa bantu bane aba tabasanzwe mu masanzo ma numba za Israeli nu tabeingile mu kisi kya Israeli, nu mwamenye buno nne nili Yehowa, Mwiya Bwangato Bunsania.”
10 Ku kabamba ka kwengelela bantu bane, batendile bunee: “Bubobelelo,” nu bubobelelo tabuli. Nkungu zikobaka muntu kitutu, nti bakitila makese matasambikwa busoga. 11 Bula babo bakutila makese matasambikwa busoga buno makoloke, mbula zabe za mwiyalo nu kisoa kinene nu makozi manene ma lubula makoloke. 12 Nkungu zagoe kitutu nti tamwasambalilwe buno makese mamwasingulaga tamakumonekako lingo.
13 Ku kabamba kakano Yehowa, Mwiya Bwangato Bunsania, akutenda bunee: “Ku lusungio lwane nakitumune na lumpumpu lunene. Nu kwabe mbula za mwiyalo ku bongoa bwane, nu makozi manene ma lubula ma bongoa bwane. 14 Ububo natumune kitutu kimwatilile makese matasambikwa busoga nu kukigusia gansi. Tulingilo twakyo tumbwe nu kyagoe nu mwakue munkatini mwakyo nu mwamenye buno nili Yehowa. 15 Ububo nasililizie lusungio lwane ku kitutu nu ku babo bakitilile makese matasambikwa busoga nu namubule bunee: ‘Kitutu takiligo lingo aba nu babo bakitilile. 16 Kubuno balengania ba Israeli bakulengania ku Yerusalema, nu kumona ku tulolesio twa bubobelelo mu misagu zage nu bubobelelo tabuli, u bwatenda Yehowa, Mwiya Bwangato Bunsania.’”
17 Uwe mwana wa muntu, tambia meiso mobe ku bakinga ba bantu bobe bakulengania ku menge mabo bobenyene. Lengania kubeli. 18 Nu tenda bunee: “Yehowa, Mwiya Bwangato Bunsania, atenda bunee: ‘Kabebe ku bakikulu bakukita bikingi binsania nu kukita bitambala bya ku itoe bya nkita na nkita ku kuluta bantu; mwalute mitima za bantu bane nu kulanga kalamo keinyu? 19 Nu mwambigia munkatini mwa bantu bane ku ntonge za mumpunge nu byindi bya kampampa buno mwite mitima za bantu batatunganana kukua, nu kulanga mitima zili na kalamo zitatunganana kulama ku nzila zeinyu za buza zikungwilila bantu bane.’”
20 Yehowa, Mwiya Bwangato Bunsania, akutenda bunee: “Lolazi, nne nili gantata ga bikingi byeinyu bimukuluta na mitima nu kuzilengia anga tuzoni, nu nne nazitikye ku magala ma maboko meinyu. Nu nasige mitima zimwalute zilenge. 21 Nate bitambala byeinyu bya matoe, nu konia bantu bane ku kuboko kweinyu aba tamwabeite lingo ku maboko meinyu, nu mwamenye buno nne nili Yehowa. 22 Ku buza bweinyu mukubika tubebe ku mitima za beisanana. Mu kubika magala ku mwagi, buno ntagaluke kutuka ku nzila zage aba kumwonia. 23 Ku kabamba kakano tamwamone ku bitondo bya bulia lingo aba kulengania bulengania. Nu nne nonie bantu bane kutuka mu kuboko kweinyu nu mwamenye buno nne nili Yehowa.”’”