Bantu beli na nkisi bazugilwa
14
1 Ububo bango bakulu ba Israeli bavule kundi, beikede lwabusio lwane. 2 Iyuki lya Yehowa lyavule kundi nu lyatendile bunee: 3 “Uwe mwana wa muntu, bantu babano beingizizie nkisi zabo mu mitima zabo, nu kubika ikozi lya kukikitania lwabusio lwabo nu bandonde. 4 Nu tenda nabo nu kubabula bunee: ‘Yehowa, Mwiya Bwangato Bunsania, atenda bunee: “Muntu unsania wa numba za Israeli wingizia nkisi zage mu mutima wage, nu kubika ikozi lya kukikitania lya bubi bwage lwabusio lwa meiso mage, nu kuvwa ku mulengania, nne Yehowa namwakule munda mwage anga bwingi bwa nkisi zage. 5 Buno nikate numba za Israeli ku mutima wabo bobenyene, kubuno bansania beli bulazi na Nne ku kabamba ka nkisi zabo.”’ 6 Ku kabamba kakano sambala numba za Israeli iyuki lilino likutuka ku Yehowa, Mwiya Bwangato Bunsania, bunee: ‘Subyazi, mugaluke nu timbulazi meiso meinyu bulazi na lusombo lweinyu nu kusiga nkisi zeinyu. 7 Nawe wa numba za Israeli aba mugeni ukulama mu Israeli na widekanukya bulazi na nne, nu kwingizia nkisi zage mu mutima wage nu kubika ikozi lya kukikitania lya bubi bwage lwabusio lwa meiso mage; kusila abasa ku mulengania kumbuzia wenyene; nne Yehowa namwakule nnenyene. 8 Nu nabike meiso mane ku muntu wozo nu namukite kuba kalolesio nu nsumo. Nu Nne namubike bulazi na bantu bane nu mwamenye buno nne nili Yehowa. 9 Ndi mulengania engelelwa nu kutenda kitondo, nti nne Yehowa u wengelela wozo mulengania nu nne nalambye kuboko kwane kweli nu kumwita buno atuke mu bantu bane ba Israeli. 10 Nu bakeeka bubi bwabo, bubi bwa mulengania bukaba anga bwa wozo ukumulonda. 11 Buno numba za Israeli tazende bulazi na nne aba kuzibigia lingo ku mibi zabo insania tondo babe bantu bane nu nabe Kalaga wabo; u bwatenda Yehowa, Mwiya Bwangato Bunsania.’”
12 Iyuki lya Yehowa lyavule kundi bunee: 13 “Uwe mwana wa muntu nkungu zanagile kisi mu kukita bwagi, nalambye kuboko kwane kukyo nu kwita kilemanizio nu kusinga nzala mukyo nu kukibika bulazi na bantu nu nyama; 14 aba babano basatu, Noa, Danieli nu Yobu banabede munda mwakyo, banoneizie mitima zabo tugu ku kwisanana kwabo, u bukutenda Yehowa, Mwiya Bwangato Bunsania.
15 Ndi natingia nyama nkali mu kisi kikyo nu zakibigia aba nu kuba bukindu buno muntu ntavwame kutinga mu kyo ku kabamba ka nyama zezo, 16 aba bantu babano basatu banabede munda mwakyo, anga bunkulama, u bukutenda Yehowa, Mwiya Bwangato Bunsania, tabanonezie bana bamulume aba bamukazi, tondo bobenyene banonezibwe nu kisi kinabede bukindu.
17 Aba ndi nalusie mwene wane wa nganda mu kikyo kisi, nu kutenda bunee: ‘Mwene, tinga mu kisi nu kuzikya bantu nu nyama,’ 18 aba bantu babano basatu banabede munda mwakyo, anga bunkulama, u bukutenda Yehowa, tabanonezie bana bamulume nu bamukazi, tondo bobenyene tugu banonezibwe.
19 Aba ndi ninasingile nzala nkali mu kikyo kisi nu kukubula lusungio lwane mukyo nu mikila nu kubika bantu bulazi na nyama; 20 aba Noa, Danieli nu Yobu banabede munda mwakyo, anga bunkulama, u bukutenda Yehowa, Mwiya Bwangato Bunsania, tabanonezie mwana aba mukinga. Banonezie mitima zabo tugu ku kwisanana kwabo.
21 Kubuno Yehowa, Mwiya Bwangato Bunsania, atenda bunee: ‘Kwitila nunse nkungu zinasinge nsungio zane inazi ku Yerusalema, mwene wa nganda, munganda, nyama nkali nu lusambo lukali, kuzikya bantu nu nyama. 22 Tondo lola, bamozi balame mubo, bekwe kumbuga kwa mwino. Bamubasile nu ga mwamone ku mwendezi wabo nu nkita zabo mwabobelezibwe ku mibi zinalusizie ku Yerusalema aba gantata ga binsania binalusizie kweli. 23 Nubo bamubobelezie nkungu ziwamone ku mwendezi wabo nu nkita zabo, nu mwamenye buno nsyakitile binsania bulia binakitile mweli,’ u bukutenda Yehowa, Mwiya Bwangato Bunsania.”