Isego lya bantu basungibwa.
5
1 Ee Yehowa, kengela kyatubasila. Lola nu umone nsoni zeitu. 2 Bwiyani bweitu bwagaluka kuba bikulo bya bageni, nu numba zeitu bikulo bya bantu ba kingo kisi. 3 Iswe tuli nkubi zakwilidwe n'isibo, nu bameiswe beli anga misigala. 4 Mazi meitu ma kunua, tukumakunza na feza; tukukunza nkuzi zeitu. 5 Babo bakutuyanga beli ku migongo zeitu; twakutwa, tatuli na bubobelelo. 6 Twalambizie maboko ku baMisri nu baAsuria buno twikute idia. 7 Batateiswe bakitile bwagi nu tabeli, nu iswe twasungibwa ku bwagi bwabo. 8 Bakobe batwangata; takuli muntu lingo wa kutonia ku maboko mabo. 9 Tukwikasana kalamo keitu lwabusio lwa mwene wa nganda mu kalula ku kabamba ka kulonda idia lyeitu. 10 Kikoba kyeitu kikuzuza anga ngulumina, ku kabamba ka bukali bwa nzala. 11 Bakwitalikila ku bakikulu mu Sayuni nu ku bikumi mu miino za Yuda. 12 Bangati bakuswikwa mu mpena ku maboko mabo, nu bakungu tabakukaswa lwanzo. 13 Mitoka zikugoga na makozi ma kugogela, nu basikila bakubungabunga na mizigo za nkuzi. 14 Bakulu tabakukundamana lingo ga lusu, nu basikila tabakugomba ngoma zabo.
15 Mbogimbogi za mitima zeitu zasila; mamina meitu magaluka idilo. 16 Nkumbu z'itoe lyeitu zakoloka; kabebe kutuli! Kubuno twakitile bwagi. 17 Ku kabamba ka kitondo kikino mitima zeitu zatamba; ku kabamba ka bitondo bibino meiso meitu tamakumona busoga. 18 Ku kabamba ka buno mwiduko wa Sayuni guli bukindu, nu mikala zikwenda mugo.
19 Ee Yehowa, uwe ukwangataga ku milyalya, nu kisumbi kyobe kya bukota kili ku kibuti na kibuti. 20 Ku kabamba kakizi watwibilila ku milyalya, nu kutusiga nkungu zeno ndazi? 21 Ee Yehowa, tugalukye kuguli, nu twagalukibwe; kita bindi byeitu bito anga bindi bya wakalazi tugalukizye bindi byeitu bibe anga bindi bya wakalazi. 22 Ndi ntwatusomba nunse, nu ndi ntukili lingo na bongoa bwingi nunse kutuli?