Yeremia
Mukanda Wa Yeremia
1
1 Bitondo bya Yeremia, mwana wa Hilkia, wa balengania babezaga mu Anatoti, mu kisi kya Benjamina. 2 Iyuki lya Yehowa lyavule kweli mu bindi bya Yosia, mwana wa Amoni, mwangati wa Yuda, mu mwaka w'ikumi nu isatu wa kwangata kwage. 3 Lingo iyuki lyavule mu bindi bya Yoyakimu, mwana wa Yosia, mwangati wa Yuda, nu kuzinda kwa mwaka w'ikumi nu umozi wa Zedekia, mwana wa Yosia, mwangati wa Yuda; nu nkungu za kwigibwa kwa Yerusalema, mu mwezi w'itano. Kumanwa kwa Yeremia
4 Iyuki lya Yehowa lyantendile bunee: 5 “Lwabusio nsikubumba munda nakumenyine, nu lwabusio ntutuka munda, nakwengezie, nakubikile kuba mulengania wa baBilongo.”
6 Nu nne natendile bunee: “Ee Yehowa, Mwiya Bwangato Bunsania! Lola, nsinavwama kutenda; kubuno nne nili mwana.”
7 Tondo Yehowa ambwide bunee: “Ntutende buno nne nili mwana, kubuno wende ku muntu unsania u nakusinge kweli, nu uwe watende kitondo na kitondo kinakukakizie. 8 Ntukue boba lwabusio lwabo, kubuno nne nili gamozi nobe kukwonia, nne Yehowa, ukubutenda.”
9 Nu Yehowa alambwide kuboko kwage, eitubizie ku kanua kane nu antendile bunee: “Lola, nabika bitondo byane mu kanua kobe. 10 Nakubika lelo gantata ga bilongo nu gantata ga makota, kutikya nu kusambula, kwita nu kuzikya; kobaka nu kuyika.”
Musumbo wa mulozi nu nyungu za mazi makubiluka
11 Lingo iyuki lya Yehowa lyavule kundi kutenda bunee: “Yeremia, kikizi kiwamona kukyo?”
Natendile bunee: “Namona ku musumbo wa muti ukumanagwa mulozi.”
12 Ububo Yehowa ambwide bunee: “Wamona busoga; kubuno nkulola ku iyuki lyane, buno nilisililizie.”
13 Iyuki lya Yehowa lyavule kundi limbizi lya mabili, kutenda bunee: “Kikizi kiwamonako?”
Natendile buno namona ku nyungu nu mazi makubiluka, nu milomo zazo kutuka ku lulenge lwa kwikazi lwa kisi.a
14 Yehowa ambwide bunee: “Kutuka ku lulenge lwa kwikazi lwa kisi mibi zabase, nu kukata bantu bansania bakwikala mu kisi kikino. 15 Kubuno lola, namane bikanga binsania bya makota ma ku lulenge lwa kwikazi lwa kisi, nne Yehowa nkubutenda, nubo bakuvwa, nu kubika muntu na muntu kisumbi kyage kya bukota lwabusio lwa kiziki kya kwingila ku nibi za Yerusalema, nu gantata ga bitutu byage ku ntungo insania, nu gantata ga miino insania za Yuda. 16 Nu nne nabasie lusungio lwane kubeli, ku kabamba ka bwagi bwabo bunsania; kubuno bansigile, bagisizie aliga ku tungo tulaga, bakumbaminne mulimo wa maboko mabo bobenyene.
17 Nu uwe kanda kibunda kyobe, utuke, ubabule bitondo binsania binakutenda, ntuzangezange ku kabamba kabo, ninavwa kukwitia na nsoni lwabusio lwabo. 18 Kubuno lola, nakukita lelo kuba mwino guli na mukolo, nu iyango lya kyuma, nu kitutu kya nsubi, gantata mitonge zage, gantata basankoga bage, nu gantata bantu ba kisi kikino. 19 Nubo beitane nobe; tondo tabakukinde; kubuno nne nili gamozi nobe buno nakwonie, nne Yehowa nkubutenda.”