Lusungio ku basombi ba Yehowa.
66
1 Yehowa atenda bunee: “Igulu lili kisumbi kyane kya bukota, nu kisi kili kisumbi kya magulu mane; munanobakila numba za lukita lukizi? Nu kiziki kyane kya kumunwa kili kuni? 2 Ndi ta kuboko kwane kwakitile bibyo binsania, nu bibyo binsania byabede?” Yehowa atenda bunee: “Nalole ku muntu wono: wozo uli na mutima wa kwibotya nu ukugiliminaga ku idagi lyane. 3 Tondo we ukusesa ngombe eli anga ukwita muntu; nu we ukukasana kisansa kya kyana kya mukoko eli anga we ukubela ikosi lya mboa; nu we ukukasana kayulo ka mbuto eli anga we ukukasana mikila za ngulube; nu we ukugisia bulago eli anga we ukukumbamina nkisi. Ee, basombwede nzila zabo bobenyene, nu mitima zabo zikubogelabogela bya nsese zabo. 4 Ububo, nkasombola mbabazio zabo, nkalusia kya kukua boba kubeli. Kubuno nkungu zinamanine ta wampa witabide, nu nkungu zinatendile ta umozi wungule. Tondo bakitile mibi lwabusio lwa meiso mane, nu kusombola binsyatananizibwe nabyo.”
5 Inyuwe bakugiliminaga ku kabamba k'idagi lya Yehowa, ungwililazi iyuki lya Yehowa bunee: “Mibuto zeinyu zikumusomba inyuwe nu zikumutikya ku kabamba k'izina lyane, zatendile bunee: ‘Yehowa aganunwe buno tumone mbogimbogi zeinyu!’ Tondo bakakua na nsoni. 6 Ungwililazi kazege kakutuka ku mwino, nu iyuki likutuka mu Numba Zasililila! Lili iyuki lya Yehowa nkungu za kuliga beiti bage nkalilo zabo.”
7 Lwabusio lwa kungwa lubaba, abuta; lwabusio ntongwa lubaba, abutile mwana wamulume. 8 Nazi ungule ku kitondo anga kikino? Nazi wamonine ku bitondo anga bibino? Ndi kisi kinabutwa mu busi bumozi? Ndi kilongo kinabutwa mu limbizi limozi? Tondo Sayuni nkungu zungule lubaba limbizi limozi abutile bana bage. 9 Yehowa abuzia bunee: “Ndi ninakasana nkungu za kubuta nu nsikubutia? Nne ukubutagia, ndi nakanda nda?” Kalaga wobe akubuzia bubo.
10 Bansania bakutunda Yerusalema, bogazibogazi nago, nu kuba na kyelele ku kabamba kago, nu inyuwe bansania bakumutunda mube na kyelele gamozi na mbogimbogi, nu inyuwe bansania bakumulilila! 11 Kubuno mumome nu kwikutibwa na mabele ma kubobelezia kwage; mumenye kukambutula nu kubogaboga ku bwingi bwa lutanuno lwago. 12 Kubuno Yehowa atenda bunee: “Lola, nkamugezizia bubobelelo anga luuzi, nu lutanuno lwa baBilongo anga mazi ma mwiyalo. Mukamoma nu kwekwa ga bukuba bwage, nu mukabobelezibwa gantata ga mazu mage. 13 Anga bukubobelezibwa mwana na nina, ububo bunkamubobelezia, nu mwabobelezibwe ku kabamba ka Yerusalema.”
14 Nkungu zimwamone ku bubuno mitima zeinyu zabogeboge, nu makwa meinyu malinde kankanka anga bukwasa bisugu. Nu kuboko kwa Yehowa kwamenywe ku bakiti bage, tondo bongoa bwage bwamoneke ku basombi bage. 15 Lolazi, Yehowa akuvwa na keiya, nu tuyanga twage tuli anga lumpumpu lukutinga; akagezia bongoa bwage bukali, nu kuzuga kwage na ngulumina za keiya. 16 Kubuno Yehowa akasungia bantu bansania ku keiya nu na mwene wa nganda; nubo bakeitwa na Yehowa bakaba beingi.
17 Bantu bakwiyengia nu koga ku mibili buno bende mu masoa, nu kugomia na babo bakulia misuna za ngulube nu mbagu nu ingo za nsese, bakeitwa gamozi. Bubo u bukutenda Yehowa. 18 Ku kabamba ka makitilo mabo nu makengelo mabo, Nne nise navwa nu kukundamania bilongo binsania nu mitendezi insania, nu bavwe nu kumona lutanuno lwane. 19 Nu Nne nabike munkatini mwabo kalolesio, nu nasinge bamozi bonezibwe ku baBilongo ku Tarsisi nu ku Puli nu ku Ludi, u babo bakunanuna bunta, nu ku Tubali nu ku Ugriki nu ku bisanga bili bulazi bitongule musagu wane aba bitamonine lutanuno lwane. Basambale lutanuno lwane ku baBilongo. 20 Nubo bakavwa na mibuto zeinyu insania kutuka ku baBilongo, anga kayulo ku Yehowa, ga farasi, nu gantata ga tuyanga twa nkita ibili nu gantata nyumbu nu ngamia ku mwiduko wasililila. Bubuno u bukubula Yehowa. Bakavwa nabo anga bukuvwaga baIsraeli na nkaso zabo ku numba za Yehowa mu mpepe nsoga. 21 Nu natole lingo bango kubo kuba basankoga nu baLawi. Yehowa atenda bubuno.
22 “Anga bwasigale lwabusio lwane igulu ito nu kisi kito kinakite, bubo u bukutenda Yehowa, ububo kibuti kyeinyu nu izina lyeinyu byasigale. 23 Kutukila mbalo za mwezi nu ku mbalo za mwezi, nu kutukila busi bumozi bwa kumunwa, u Sabato, aaba nu ku bungo, ububo bantu bansania bakulamaga mu mubili bakavwa nu kunkumbamina lwabusio lwane, bubo u bwatenda Yehowa. 24 Nubo babase kumbuga nu kulola bitumba bya babo banagide, kubuno mikuso zabo tazakue, aba keiya kabo takazime, nu basombwe na bantu bansania.”