Makulo ma Kalaga ku baIsraeli.
65
1 Nidolelesizie ku babo batambuzizie; nu namonekile nabo batandondaga. Natendile ku kilongo kitamanine izina lyane bunee: “Ndolazi, Ndolazi!” 2 Nalambizie maboko mane musi unsania ku bantu baguni, bakwenda mu nzila zitaswaga, kuyanga makengelo mabo tugu; 3 bantu banongezie lwabusio lwa meiso mane kankanka, nu bakasenne bisansa ku masoa mabo nu kugisia aliga gantata ga tusenga twa mabiliki. 4 Bakwikala munkatini mwa nsinda nu kwikala kindi na kindi mu biziki bya kubisama. Babano bakulia nyama za ngulube, nu idia lya nsese lili mu nyungu zabo. 5 Bantu babano beli anga muuki ku myembe zane, nu anga keiya kakubanga bindi binsania. Bakutenda bunee: “Sigala bulazi na nne, ntunkunde, kubuno nasililila kukutinga.”
6 Lola, kitondo kikino kyasanzilwe lwabusio lwane. Nsikeikala kibibi, tondo nkabaliga nunsania, ee, nkabaliga ku bukuba bwabo 7 mibi zabo nu mibi za beisibo, u bukutenda Yehowa, kubuno bagisizie bulago gantata ga miduko nu kundinga gantata ga tukililo nkabalindika ku bukuba bwabo nkalilo za milimo zabo za wakalazi.
8 Yehowa atenda bunee: “Anga bwamoneka maku m'ituba mu kisagasaga kya muzabibu nu bantu batenda bunee: ‘Ntukibigie kubuno bukili mukyo,’ bubo u bunakite ku kabamba ka bakiti bane; nsikabeita bansania. 9 Nu nne nkalusia kibuti kya Yakobo nu kya Yuda kwiyana miduko zane. Bantu bane banasombwede bakeiyana zo nu bakiti bane bakeikala kuko. 10 Nu Saroni kikaba kiziki kya kulisiaia mikoko, nu kibitabita kya Akori kiziki kya kwiyombeka kya bibombo bya ngombe, ku kabamba ka bantu bane bandondile.
11 Tondo inyuwe basiga Yehowa nu bakwibilila mwiduko wane wasililila, nu bakwanza meza ku kabamba ka Bahati, nu kwizazia bituma bya maku ku kabamba ka Ajali, a 12 nkamusanza inyuwe ku kwitwa na mwene wa nganda, nu mukakumbama bansania nu kuseswa; kubuno nkungu zinamumanine tamwitabide, nkungu zinatendile tamungwilide. Mwakitile bubi lwabusio lwane, nu mwasombwede bitondo bitantananizizie.”
13 Ku kabamba kakano Yehowa, Mwiya Bwangato Bunsania, atenda bunee: “Bakiti bane bakalia, tondo inyuwe mukakua na nzala; bakiti bane bakanua, tondo inyuwe mukakua na mpusia; bakiti bane bakabogaboga, tondo inyuwe mukakua na nsoni. 14 Bakiti bane bakeimba na mbogimbogi mu mitima, tondo inyuwe mukalila na kabebe mu mitima nu mukalila ku kabamba ka kabebe kanene ka mutima. 15 Mukasiga izina lyeinyu kuba kiswililo ku musombolwa wane; kubuno Yehowa, Mwiya Bwangato Bunsania, akamwita, nu akamana bakiti bage ku lingo izina. 16 Muntu unsania mu kisi ukatunda kukaswa mponga akakaswa zo na Kalaga wa bulili; nu we ukulumbila mu kisi akalumbila ku Kalaga wa bulili, kubuno nsungio ntangi zibililwe nu zabiswe lwabusio lwane.
17 Lola, nne nabumbe meigulu mato nu kisi kito, nu bitondo bitangi tabikakengelwa lingo, aba tabikeingila mu mutima. 18 Tondo bogazibogazi na kyelele nunsania, ku kabamba ka bibyo binabumbe. Nabumbe Yerusalema kuba na kyelele, nu bantu bago babe na mbogimbogi. 19 Nu nne nabogelebogele Yerusalema, nu nabogelebogele bantu bane, nu idilo talyungubwe ko lingo, aba iyuki lya kulila.
20 Takwabe lingo mwana wa bindi bikeke tugu, aba mukungu utakukya bindi byage; kubuno wozo wakue geli na myaka lukama aganzwe buno eli musikila, nu mwagi aba eli na myaka lukama aswililwe. 21 Nubo bobake numba nu kwikala muzo, nu bayike mizabibu nu kukala biguma byazo. 22 Takwabe lingo buno bobake numba nu bana u beikale muzo; tabayike mbuto nu bango balie biguma byazo. Kubuno anga buli bindi bya muti, ububo byabe bindi bya bantu bane, nu basombolwa bane babogelebogele milimo za maboko mabo bindi byingi. 23 Tababe na lusungio ku milimo za buliabulia, tababute ku mbabazio; babe bantu bakaswa mponga na Yehowa, nu bana babo gamozi nabo. 24 Lwabusio tabemmana nabeitabile; nkungu zibakutenda nungwe. 25 Mboa za mu lubanda nu kyana kya mukoko bakalia gamozi, nu kimbwe kikalia bisugu anga ngombe, tondo mukungu ukaba idia lya nzoka. Tabikatoa aba kubigia ku mwiduko wane unsania wasililila.” Yehowa atenda bubo bunsania.