BaIsraeli basega lonio.
64
1 Ee, songo unatile igulu nu kugela, buno miduko zigilimine lwabusio lwobe! 2 Anga bukugisia keiya tuti twakama, nu anga bukukulungulaga ngulumina za keiya mazi, kumba kumenyesia beiti bobe izina lyobe nu bilongo bigilimine lwabusio lwobe. 3 Kubuno nkungu ziwakitile bitondo bya kwitia boba bitutalemaninne, wagelile nu miduko zatengiletengile lwabusio lwobe. 4 Kutukila wakalazi ta wampa wungule, aba kutuzi takungule, aba liso talyamonine ku ungo Kalaga, tondo uwe, nu bitondo byukukitila babo bakukulindila. 5 Uwe ukuvwa kukasia babo bakukita kwisanana na mbogimbogi, u babo bakukengela nzila zobe. Tondo nkungu zitwakwagilaga watongedwe. Buni butunonibwa? 6 Iswe bansania twabede anga kintu kya nsese, nu kwisanana kweitu kunsania kuli anga mukungio wa nsulu zili na nsese; iswe bansania twakama anga lusamba, nu mibi zeitu zatutikizye anga bukulengagia lumpumpu. 7 Lingo takuli wampa ukumana izina lyobe, ukuyuka nu kwidanda kuguli; kubuno watubisile malanga mobe, nu watubabazizie ku kabamba ka mibi zeitu.
8 Ee Yehowa, uwe uli Tateiswe; iswe tuli ibumba nu uwe uli Mubumbi weitu; iswe bansania tuli mulimo wa maboko mobe. 9 Ee Yehowa, bongoa bwobe tabube bwingi, aba ntukengele bubi kutuli bindi binsania; lola, tukukusega kutulola, kubuno iswe bansania tuli bantu bobe.
10 Miino zobe zasililila zise makindu, aba Sayuni uli kalula, nu Yerusalema waziminne. 11 Numba zeitu zasililila nu nsoga nunse, muzo batateiswe bakuganwine, zagide na keiya, nu binsania byabezaga bisoga kutuli byabigile. 12 Yehowa, ndi ukeidanga ku kabamba ka bitondo bibino? Ndi ukwikala kibibi nu kutubabazia nunsania?