Lusungio ku babo batakukua Kalaga boba.
63
1 Nazi wono watuka ku Edomu, nu kutuka ku Bosira na nsulu zakisimana nunse? Nazi wono uli na nsulu za lutanuno, ukwenda na magulu na bunene bwa magala mage? Nne Yehowa ukusambala lonio lweinyu. Nne Yehowa uli na magala ma konia.
2 Kubuni nsulu zobe zakisimana, anga za muntu ukupota mizabibu mu kansango?
3 Nnenyene nanyantile ga kansango ka kupota maku; kutukila bilongo takwabezaga wampa gamozi na nne! Ku bongoa bwane nabanyantile, nu ku bongoa bwane bukali nabanyantile nunsania; mikila zabo zasandukile ku nsulu zane, nu Nne nabigizie nsulu zane insania. 4 Kubuno busi bwa kwisuba bwabezaga mu makengelo mane, nu mwaka wa bukuluzi bwane wabasile. 5 Nalolile, tondo takuli mukasia wampa; nangamine kubuno takuli wankasizie; umpanga kuboko kwane kokwenyene kwanonezie. Bongoa bwane bukali bwankasizie. 6 Ku bongoa bwane nanyantile bilongo, nu nabilebesizie na lusungio lwane; nu Nne nakubule mikila zabyo gansi.
7 Nasambale mponga za Yehowa, u misako zage zalusia luganuno kweli bulingilingi na binsania byatukitide Yehowa, nu bwingi bwa mponga zage ku numba za Israeli; abakitide bulingilingi na kyombo kyage nu ku bwingi bwa mponga zage. 8 Abwide bunee: “Lebelebe babano beli bantu bane, u bana batakuneka buza.” Nu abede Monia wabo. 9 Mu tubebe twabo tunsania nu We abede na tubebe; nu mwanzelo uli lwabusio abede monia wabo. Mu lutundo nu kyombo abakulwide; abazanzwide nu kubeka bindi binsania bya wakalazi.
10 Tondo bamugunine nu kwinia Muuza wage Wasililila mutima. Ku kabamba kako agalukile kuba mwiti wabo, nu alwanine nabo. 11 Tondo akengede bindi bya wa kalazi, bya Musa nu bantu bage, nu atendile bunee: “Kuni kuli wozo wabasokezie ku kitatenge nu mulangi wa kibombo kyage? Kuni kuli wozo wabikile Muuza wage Wasililila munda mwabo, 12 wabasondelezizie na kuboko kwage kwa lutanuno nu magala mage ku kuboko kwa seidume kwa Musa, wabeganizie mazi lwabusio lwabo, buno eikitile izina lya milyalya, 13 wozo wabasondelezizie mu biziki bizindu bya kitatenge? Anga farasi mu kalula tabakikitaninne. 14 Anga bukukumba ngombe ku kibitabita, Muuza wa Yehowa abakasile bubobelelo. Anga bubo, ee Yehowa, wasondelezizie bantu bobe kwikitila izina lya luganuno.”
15 Ee Yehowa, lola kutukila kiziki kyobe kyasililila kya kwigulu nu kisumbi kyobe kyasakama nu kya lutanuno. Lugi lwobe luli kuni? Nu bwangato bwobe buli kuni? Kulila kwa mutima nu kyombo byananibwa kutuli. 16 Tondo uwe ukili Tateiswe, aba Abrahamu ntakutumenya, nu Yakobo ntatwitabizia. Ee Yehowa, uwe ukili Tateiswe, nu izina lyobe lili Mukuluzi weitu kutukila milyalya. 17 Ee Yehowa, kubuni watusiga kuzangazanga ku nzila zobe nu kutubika mitima mibibu buno tatukukue boba? Subya bikanga bya bwiyani bwobe ku kabamba ka bakiti bobe. 18 Bantu bobe beiyanine kisi kyasililila ku nkungu nkeke tugu; nu kano kaluma beiti beitu bakunyanta mu biziki byobe byasililila. 19 Tuli anga kilongo kyutangatile kutukila wakalazi, nu kitamaninwe ku izina lyobe, ee Yehowa.