Lutanuno lwa Sayuni.
62
1 Ku kabamba ka Sayuni nsikwikala kibibi, nu ku kabamba ka Yerusalema nsyomunwe, aaba nu kwisanana kwage kwasane anga kukya kwa busi, nu lonio lwage anga bukusana kasuku kabanga. 2 Nu baBilongo bakamona kwisanana kwobe nu bakota bansania bakamona lutanuno lwobe; nu wamanwe ku izina ito, likamanwa mu kanua ka Yehowa. 3 Nu uwe ukaba na nkumbu nsoga mu kuboko kwa Yehowa, nu nkumbu za kusana za bukota mu kuboko kwa Kalaga wobe. 4 Ntukamanwa lingo Musigala, aba kisi kyobe takikamanwa Bukindu; tondo ukamanwa Hefsiba, u kutenda buno Namubogelabogela, nu kisi kyobe kikamanwa Beula, u kutenda buno Musongwa, kubuno Yehowa akakubogelabogela, nu kisi kyobe kikasongwa. 5 Kubuno anga bukusonga musikila kikumi, ububo bana bobe bakakusonga; nu anga bukubogelabogela musongi kikumi kyakusonga, ububo Kalaga wobe akubogelebogele.
6 Ee Yerusalema, nabikile mulangi gantata ga mikolo zobe; tabakungwilila musi unsania aba kindi kinsania; inyuwe bakulilila Yehowa, tamwikale kibibi! 7 Tamumusige kwikala kibibi, ndi ntemanukya nu kukita Yerusalema kuba luganuno mu kisi kinsania. 8 Yehowa alumbide ku kuboko kwage kwa seidume, u kuboko kwa magala mage bunee: “Lebelebe nsikakasa beiti bobe mbuto zobe zibe idia lyabo; nu bana ba bageni tabakanua maku mobe mawakambilaga. 9 Tondo balitubwide bakalilia, nu kuganuna Yehowa, nu babo bamasongezye bakamanua ga milungu za kiziki kyane kyasililila.”
10 Ingila, ee ingilazi ku nibi! Longekazi nzila ku kabamba ka bantu. botyazi, botyazi nzila nnene! tikyazi makozi muzo. Sakikazi ibendela ku bilongo! 11 Menyazi buno Yehowa asambede musagu aaba nu kuzinda kwa kisi. Musambalile kikumi kya Sayuni bunee: “Lola, Monia wobe akuvwa, lola, eli gamozi na lukalilo lwage, nu nkalilo zage eli nazo.” 12 Bamanwe Bantu Basililila, Bakululwa na Yehowa; nu wamanwe Walondagwa, Mwino utasigilwe lingo.