61
1 Muuza wa Yehowa, Mwiya Bwangato Bunsania, uli gantata gane, kubuno Yehowa ambongezie mwambo nisambale musagu musoga ku bazambi; ansingile buno nonie batamba mitima, nu kusambalila bakandwa bukandulwa bwabo, nu bakandilwe musagu musoga wa kukandulwa kwabo, 2 nu kusambala mwaka wa mponga za Yehowa nu busi bwa musubo wa Kalaga weitu, nu kubobelezia bansania bakulila, 3 nu kubabikila babo bakulila mu Sayuni nsulu nsoga zalebibwa ga kiziki kya lwito, nu mwambo wa mbogimbogi ga kiziki kya kulila, nu nsulu za luganuno ga kiziki kya mutima muzitu. Bamanwe miti zisanana zayikilwe na Yehowa buno aganunwe. 4 Nubo bakobaka ga biziki bya wakalazi byabigile, nu bakobaka lingo numba ga makindu ma wakalazi; bakite miino mito ga biziki bya miino zabezaga makindu ku kibuti na kibuti. 5 Nu bageni bakalanga bibombo byeinu bya bituganwa, nu bageni bakalima mu masoa meinyu ma mbuto nu ma mizabibu. 6 Nu inyuwe mwamanwe basankoga ba Yehowa; bantu bakamumana bakambi ba Kalaga weitu. Mukalia bikulo bya baBilongo, nu ku kabamba ka bikulo byabo mukeiganuna. 7 Ga kiziki kya nsoni babo bantu bane babe na lutanuno mambizi mabili, nu ga kiziki kya kutakaswa lwanzo bakabogelabogela bupieni bwabo. Ububo bakapiena byindi bibili mu kisi kyabo, nu bakaba na mbogimbogi za milyalya.
8 Kubuno nne, u Yehowa, natunda kwisanana, nu nasomba bwibi nu bubi; nu Nne nabalige nkalilo za bulili, nu nakite nabo idagano lya milyalya. 9 Nu kibuti kyabo kyamenywe munkatini mwa baBilongo, nu kibuti kyabo munkatini mwa bikanga bya bantu. Bansania babamoneko beitabizie buno bo beli kibuti kyakasilwe mponga na Yehowa.
10 Nkubogaboga nunsania mu Yehowa; mutima wane ukubogaboga mu Kalaga wane. Kubuno amvwalikizye nsulu za lonio, nu kumvwalikya nsulu za kwisanana, anga bukwidebya musongi ku itoe na nsulu za malebo, nu anga bukwidebya mwakali na bya malebo bya olo. 11 Kubuno anga bukwasia nsi biyikanwa byazo, nu anga bukunagya isoa mbuto zayikwa mulyo, ububo Yehowa, Mwiya Bwangato Bunsania, asie kwisanana nu luganuno lwasakikwe lwabusio lwa bilongo binsania.