Lutanuno lwa Sayuni.
60
1 Yuka, usane! Kubuno kyengi kyobe kyabasa, nu lutanuno lwa Yehowa lwasanuka gantata gobe. 2 Lola, kapilo kakukila kisi, nu kapilo kakali kakukila bantu ba bilongo; tondo Yehowa akusanuka gantata gobe, nu lutanuno lwage lukumoneka gantata gobe. 3 BaBilongo bakwenda mu kyengi kyobe, nu bakota mu kusana kwa kusanuka kwobe. 4 Tambia meiso ku ndenge zobe insania, umone bansania bakundamana nu bakuvwa kuguli; bana bobe batuke bulazi, nu bakinga bobe bekwe mu maboko. 5 Ee wamone nu wasanibwe kyengi, nu mutima wobe wagilimine nu kubogaboga nunse; ntiko ningi za kitatenge zalusibwe kuguli, nu bugumi bwa baBilongo bwavwe kuguli. 6 Bibombo byingi bya ngamia byakukile kisi kyobe, u byana bya ngamia bya Midiani nu bya Efa. Nu bansania batuka ku Seba, bakweka olo nu bulago, nu basambale luganuno lwa Yehowa. 7 Bibombo binsania bya Kedari byakundamane kwobe, nu bilimba bya mikoko bya Nebayoti binsania byakukambile. Byakasanwe gantata ga kasenga kane ka tuyulo nu kwitabizibwa, nu nne naganuzie numba zane za lutanuno.
8 Banazi babano bakulenga anga bimpa, nu anga bukulenga nkulimba ku bizumba byazo? 9 Bulili, bisanga bikulola kundi, nu maato manene ma Tarsisi makubisondelezia; bakulusia bana bobe kutuka bulazi, nu feza zabo nu olo zabo gamozi nabo, ku luganuno lw'izina lya Yehowa, Kalaga wobe, kuli Wasililila wa Israeli, kubuno akuganuzizie.
10 Nu bageni bobake mikolo zobe, nu bakota babo bakukambile; aba mu bongoa bwane bukali nakulibwide, mu mponga zane nakukwile kyombo. 11 Nu nibi zobe zasigale zeigulwa kankanka; tazigalwe mu musi aba mu kindi, buno bantu bakuvwile na bikulo bya baBilongo, nu bakota babo basondelezibwe kuguli. 12 Kubuno kilongo aba bukota butakuziga kukukambila babigibwe, nu bilongo bibyo byabe bukindu nunsania. 13 Luganuno lwa Lebanoni lwavwe kuguli, u muberoshi nu mutizari nu muteashuri gamozi kulebya kiziki kyane kyasililila. nu Nne nakite kiziki kya magulu mane kuba na lutanuno.
14 Bana ba babo bakusungagia bavwe kuguli nu kukukumbamina; nu bansania bakukubengaga bakukomene mazu; bakumane Mwino wa Yehowa, u Sayuni wa Wasililila wa Israeli.
15 Aba wasigilwe nu wasombilwe geteli muntu wampa kutinga kwobe, nakukite kuba na lutanuno lwa milyalya, nu mbogimbogi mu kibuti na kibuti. 16 Nu wanue mabele ma baBilongo, nu wamome ibele lya bakikulu ba bakota; nu uwe wamenye buno nne nili Yehowa, Mukuluzi wobe nu Monia wobe, u Mwiya Magala wa Yakobo. 17 Ga kiziki kya nsubi navwe na olo; ga kiziki kya kyuma navwe na feza; ga kiziki kya muti navwe na nsubi, nu ga kiziki kya makozi navwe na kyuma; nu nakite bemanizi bobe kuba na bubobelelo, nu bangati bobe kuba na kwisanana. 18 Kabenga takakaba lingo mu kisi kyobe, nu kuzikya nu kubiga takwabe mu myaga zobe; tondo wamane mikolo zobe Lonio, nu nibi zobe Luganuno.
19 Musi tagukaba lingo kyengi kuguli mu nkungu za musi, aba mwezi tawakukase kyengi aba kusana; tondo Yehowa abe kyengi kyobe kya milyalya, nu Kalaga wobe abe lutanuno lwobe. 20 Musi wobe tagukeida lingo, aba mwezi wobe tagukaba na kapilo; kubuno Yehowa abe kyengi kyobe kya milyalya, nu bindi byobe bya kulila byasile. 21 Bantu bobe bansania babe beiya kwisanana, nu bapiene kisi ku milyalya. Beli mbuto zinayikile, u mulimo wa maboko mane buno niganunwe. 22 Wozo uli mukeke wobe abe kanunu, nu wozo mukeke kutinga bansania abe kilongo kya magala. Nne Yehowa nakite bitondo bibino lubilo mu nkungu zabyo.