Bwagi bwalekanukya bantu na Kalaga.
59
1 Lebelebe kuboko kwa Yehowa takukokoka magala buno ntanavwama konia; aba kutuzi kwage takwaziba buno ntanavwama kungwa. 2 Tondo mibi zeinyu zamulekanukya na Kalaga weinyu, nu bwagi bweinyu bwabisa malanga mage kumuli, buno ntakuziga kungwa. 3 Kubuno maboko meinyu meiyala nsese na mikila, nu minwe zeinyu zeiyala nsese za mibi. Milomo zeinyu zikweka buza; ndami zeinyu zikutenda manungunungu mabi. 4 Takuli ukusongela bulili; aba takuli ukugamba ku bulili; bakulemanina bitondo bya buliabulia nu kweka buza; bakweka meimi ma mbabazio, nu kubuta bubi. 5 Bakutela mongu ma nzoka, nu kuluka kakila ka molulu. We ukulia mongu mabo nti akua, nu lilino ndi lyatotolwa nti mwabasa nzoka. 6 Tukila twabo tatwabe nsulu aba tabeikukile na milimo zabo; milimo zabo zili milimo za mibi, nu misako za bwiti zili mu maboko mabo. 7 Magulu mabo makusasia ku mibi, nu bakusasia kukubula mikila ziteli na kabamba; makengelo mabo meli makengelo ma bwagi, nu nzikyo nu kubigia bili mu nzila zabo. 8 Tabeizi nzila za bubobelelo, aba mu makitilo mabo tamuli lusungio lwa bulili; bakwenda mu nzila za buzimizi, nu muntu unsania ukwenda mu zezo nzila nteli na bubobelelo.
9 Ku kabamba kakano lusungio lwa bulili lwa Kalaga luli bulazi n'iswe, nu bwisanana tabukuvwa kutuli. Tukulindila kyengi, tondo tukumona mwizi; tukulindila kusana kwa busi, tondo tukwenda mu mwizi munene. 10 Tukubabatababata kulonda kitutu anga kyuku; tukubabata anga babo beteli na meiso; tukukikitanwa mu musi wa ngalangala anga mu nkungu za mwizi; munkatini mwa beli na magala twabede anga bakuzi. 11 Iswe bansania tukubila anga dubu nu kwima anga nkulimba; tukulonda lusungio lwa bulili, tondo tatukumona lwampa, nu lonio tondo luli bulazi n'iswe. 12 Kubuno mibi zeitu zili ningi nunse lwabusio lwa Kalaga, nu bwagi bweitu bukutusongela. Bwagi bweitu buli n'iswe kankanka, nu tukwigonga mibi zeitu: 13 kwaga nu kweka buza ku Yehowa, nu kukasa Kalaga migongo zeitu, nu kukita kabenga nu lunano nu buguni, nu kweka buza bwalingile mu mitima zeitu. 14 Ububo lusungio lwagalukile kumbusa, nu bwisanana bwasigala bulazi nunse, kubuno bulili bwagwede mu nzila, nu bwisanana tabuneingila. 15 Bulili tabwamonekile ko, nu we witukye mu bwagi akunyegwa na banyagi.
Nu gamonine Yehowa ku bitondo bibino, einine mutima kubuno takuli bwisanana. 16 Amonine buno takuli muntu wampa; angamine kubuno takwabezaga umozi wa kusegela bango, nu kuboko kwage wenyene kwamulusizie lonio, nu bwisanana bwage u bwamukasizie. 17 Avwalile kwisanana ku bukuba anga ngabo, nu nkumbu za lonio ku itoe lyage; avwalile anga nsulu ngabo zage za kusuba, nu avwalikibwe lugi anga ikoti. 18 Akabaliga bulingilingi na misako zabo; akabaliga bongoa bwage bukali ku babo bakwitana nage, nu nkalilo ku beiti bage, nu We akeisuba ku bisanga. 19 Bantu bakakua izina lya Yehowa boba kutukila kunsi kwa kisi, nu lutanuno lwage kutuka kukutukaga kisongo kya busi. Nkungu zikwingila beiti anga mwiyalo, Muuza wa Yehowa ukasakika ibendela gantata gabo.
20 Nu Monia akavwa ku Sayuni, nu ku babo ba numba za Yakobo bakugaluka kutuka ku mibi zabo. Bubuno u bukutenda Yehowa. 21 Yehowa akubula bunee: “Ku misagu zane, lilino u idagano lyane nabo: Muuza wane guli gantata gobe, nu bitondo byane binabikile mu kanua kobe tabyatuke mu kanua kobe, aba mu tunua twa bana bobe, aba mu tunua twa bayukulu bobe kutukila lelo aaba nu ku milyalya.” Bubo u bwatenda Yehowa.