Tuyulo tuteli na mutali.
58
1 Laluka, ntusige; laluka n'iyuki inene anga monze, sambalila bantu bane buguni bwabo, nu ku baIsraeli bwagi bwabo. 2 Kubuno bakundonda bindi binsania; bakwidolesia buno bakutunda kumenya nzila zane, anga kumenywa buno beli bantu bakukita busoga nu batakusiga milembe za Kalaga wabo. Bakumbuzia nsungio zisanana nu bakwidolesia buno batunda Kalaga abakunde. 3 Batenda bunee: “Kubuni twikandile idia, nu uwe ntukubumona? Kubuni twibotezie nu ntwabulolile?” Tondo mu bindi bya kwikanda idia kweinyu mukukita bitondo byakwitananizia nu kulusia kabebe ku bakiti beinyu bansania. 4 Kwikanda idia kweinyu kukulusia nsake nu myango nu kulibulana kinkunya kibibu. Tamunavwama kwikanda idia anga bumukukita lelo nu kulemanina kungubwa kwigulu. 5 Ndi nasombwede lukita lulo lumukwikanda nalo idia lelo? Ndi natananizibwe na busi bwa kwibotya nu kwikumba itoe anga nsolu, nu kwanza nsulu z'ikunino mu lwito gansi? Ndi bubuno u buukumana kwikanda idia, nu busi bukutananizia Yehowa?
6 Ndi nsyasombwede busi bwa kwikanda idia bwa lukita luluno: kukandula bikando bya bwagi, nu kukandula mizigi za bisanga, nu kusiga babo basungizibwe buno bende na bubobelelo, nu kubungula bikando bya bisanga binsania? 7 Ndi takubeganizia beli na nzala idia lyobe, nu kwingizia bazambi beisilwe kumbuga mu numba zobe? Ndi wamona muntu eli mundulu, muvwalikye, aba ntwikenge na muntu uli na mubili anga wobe?
8 Ububo kyengi kyobe kyabase anga kisongo kya busi nu wasasie kona, nu kwisanana kwobe kwabe lwabusio lwobe, nu lutanuno lwa Yehowa lwakuyange kumbusa kwobe kukulanga. 9 Bubo wamane, nu Yehowa eitabizie; walile nu We atende bunee: “Nili gano.”
Ndi watikya kikando kya lubabazio munkatini mwobe gamozi na kulambya munwe nu kutenda bubi, 10 nu ndi wakasana kalamo kobe ku wozo uli na nzala, nu kwikutia kalamo kasungizibwe, nti kyengi kyobe kyasane mu kapilo, nu kapilo kobe kabe anga musi mukali, 11 nu Yehowa akusondelezie kankanka, nu akeikutia kalamo kobe mu kisi kyakama, nu kukasa makwa mobe magala nu uwe wabe anga isoa lyasandilwa mazi, nu anga kanuabalongo katakukama mazi mako. 12 Nu bantu bobe bobake ku biziki bya wakalazi byasigede makindu; wabike lingo bibanza bya wakalazi; nu uwe wamanwe n'izina lya Mukulumizi wa bitutu byagwede, nu Mwisanania wa nzila za numba.
13 Ndi walanga kugulu kwobe busi bwa Sabato buno ntukite kusombola kwobe mu busi bwa Yehowa bwasililila, nu kumana busi bwa Sabato busi bwa mbogimbogi, nu busi bwasililila bwa Yehowa buli busi bwa lwanzo; nu ndi wabwanza geteli kuyanga nzila zobe uwenyene, aba kulonda kusombola kwobe uwenyene aba kutenda bitondo byobe uwenyene, 14 nti wibogiebogie mu Yehowa, nu Nne nakusakike ku biziki byasakama bya kisi, nu nakulisie ntiko za so Yakobo. Bubo u bwatendile Yehowa.