57
1 Wisanana akukua, aba takuli muntu ukulanga bitondo bibino mu mutima; bantu basoga bakukua, aba takuli muntu ukukengela buno wisanana akutikibwa lwabusio lwa mibi. 2 Wozo ukwenda mu bulili eingile mu bubobelelo; omunwe nkungu zeiyombeka ga mugu wage. 3 Tondo inyuwe bana ba mukikulu kabula, u kikanga kya bwengelezi nu butazi, kundazi gano! 4 Mukukita nguza na nazi? Mukulimbula tunua tweinyu, nu kubasia ndami zeinyu ku kabamba ka nazi? Ndi tamuli bana ba baguni, nu kikanga kya boza? 5 Mwayukizie ntundo zeinyu gansina ga miti zili na nsamba zitakuomaga; mwakasenne bana beinyu kuba tuyulo mu mpinga nu kunsi kwa nanda zatika. 6 Kyindi kyeinyu kili munkatini mwa makozi makolombela ma mu nuuzi. Ee mamo meli kyindi kyeinyu. Lebelebe mwamakubulide nkaso za maku nu tuyulo twa mbuto. Ndi nabobelezibwe na bitondo bibino? 7 Gantata mwiduko mulazi nunsania wabikile mugu wobe, aaba kuko wabakamine kukasana tuyulo. 8 Nu kumbusa kwa nibi zobe nu mango ma nibi wimikile tukengelezio twobe twa nkisi. Mu kunsiga wasakikile nsulu, watalikide ku mugu wobe, nu wakitile idagano na babo bawatundile migu zabo, nu wamonine ku mundulu wabo. 9 Wendile ku Moleki na makiti nu watalikide bulago bwobe; wasingile basingwa bobe bulazi, nu wigezizie aaba nu mu nsinda. 10 Wabezaga wakutwa ku kabamba ka nzila zobe, tondo ntwazigile kutenda buno takuli kilemanizio. Wakatile magala mato ku kabamba kakano, nu bubo ntwakutwa. 11 Wakule nazi boba bukali buno wanengelede geteli kunkengela? Nu wanibilide nu kutalanga kitondo kikino mu mutima wobe. Ndi ntukunkua boba kubuno nikede kibibi nkungu ndazi?
12 Nasambale bulili bwobe nu makitilo mobe, tondo tamakulusizie mutali. 13 Nkungu ziukulilila kukasibwa, kibombo kya nkisi zeinyu kikonie! Tondo lumpumpu lwazilengie insania, nu muuza mukeke wazipupie. Tondo muntu wankatizia apiene kisi, nu kupiena mwiduko wane wasililila. 14 Nu natende bunee: “Longekazi! Longekazi nzila! Tikyazi kinsania kya kukikitania mu nzila za bantu bane.”
15 Kubuno wozo Wasakama Nunse, nu ukulama ku milyalya na milyalya nu uli n'izina lyasililila akutenda bunee: “Nne nkwikala mwigulu nu mu kiziki kyasililila nunse, tondo nkwikala gamozi na wozo uli na mutima wa kwigonga nu kwibotya, buno nayukye mutima wa wozo ukubotya nu kulamia lingo mutima wa wozo ukwigonga. 16 Kubuno nsyabe na myango bindi binsania, aba nsyabe na bongoa bukali bindi binsania, kubuno mutima unatambile lwabusio lwane nu tulamo twa babano banabumbile. 17 Ku kabamba ka ntundo mbi nongilwe nunse; namusungizie nu nibisile kweli mu bongoa, nu we itide mu nzila zage mbi. 18 Namonine ku nzila zage, tondo namwonie; namusondelezie nu namusubizie bubobelelo bwage, we nu babo bakumulilila. 19 Nu nabike luganuno ku milomo za babo baIsraeli bakulila. Bubobelelo, ee, bubobelelo ku babo beli bulazi nu ku beli bwigi.” Yehowa atenda lingo bunee: “Nabonie. 20 Tondo babi beli anga kitatenge kyakulunguka kitanavwama kolelela, nu mazi makyo makulusia mputia nu busasa.” 21 Kalaga wane atenda bunee: “Takuli bubobelelo ku babi.”