Kumanwa kwa baBilongo.
56
1 Yehowa akutenda bunee: “Anzazi milembe nu kitazi bulili, kubuno lonio lwane luli bwigi na kuvwa, nu bwisanana bwane kulolesibwa. 2 Mbogimbogi ku muntu ukukita bitondo bibino, nu mwana wa muntu ukubikokomezia nunsania, ukwanza kindi kya kumunwa, u Sabato, geteli kukibenga, ukulanga kuboko kwage buno takukite mibi insania. 3 Aba mugeni wikulumania na Yehowa ntatende bunee: ‘Yehowa ambikile bulazi na bantu bage.’ Aba muntembele ntatende bunee: ‘Lola, nili anga muti wakama.’ 4 Kubuno nne Yehowa, nkubula mintembele zikwanza bindi bya Sabato, nu kusombola bitondo byantananizia, nu kwanza idagano lyane nunse bunee: 5 ‘Nabakase kiziki mu numba zane zasililila, ee munkatini mwa bitutu byazo, nu izina lili kubeli kalolesio kasoga kutinga kubuta bana bamulume aba bamukazi.’
6 Nu ku bageni beikasenne ku Yehowa kumukitila nu kutunda nunse izina lya Yehowa nu kumukumbamina, ku bansania bakulanga busi bwage bwa Sabato geteli kubukagula, nu bakwanza nunsania idagano lyage, 7 aba babo nabalusie ku mwiduko wane wasililila, nu nababogiebogie mu numba zane za masego. Tuyulo twabo twakugisibwa nu bisansa byabo bitabizibwe gantata ga kasenga kane ka tuyulo, kubuno numba zane zamanwe numba za masego ku bilongo binsania. 8 Yehowa, Mwiya Bwangato Bunsania ukukundamania babo ba Israeli beimbizibwe akutenda bunee: ‘Aba bubo nakundamanie bango gamozi na babo basila kukundamanibwa kalazi.’”
9 Inyuwe bituganwa binsania bya mu isoa, muvwe; nu inyuwe nyama insania za mu lubanda, muvwe mulie. 10 Balangi ba Israeli beli byuku, bobansania ba Yehowa tabakumenya; bansania beli anga mboa tuluma, tazikuvwama kuguma; beigonda gansi nu kukesia na ndozi, nu bakutunda kwiyombeka tulo. 11 Beli mboa zili biliagundu nunsania; tabakwikuta aba kakeke. Beli balangi batakuvwama kumenya kampa; bagaluka kuyanga nzila zabo bobenyene, nu bakulonda nawe nawe mutali wage tugu.
12 Bakutenda bunee: “Muvwe; nkulonda maku! Twikute nu kulebwa, nu lubi kwabe anga lelo, aba busoga kutinga.”