Lonio lwakaswa ku baBilongo bansania.
55
1 Inyuwe bansania beli na mpusia, vwazi; aba uteli na feza, avwe; kunzazi nu mulie! Buligo, muvwe mukunze maku nu mabele geteli bukunza. 2 Kubuni kumukutikya feza ku kintu kiteli idia? Nu mulimo weinyu ku kintu kitakwikutia? Nnungwililazi nunsania, nu mulie idia lili isoga, nu mitima zeinyu zibogeboge. 3 Tegekelazi, nu vwazi kundi; ungwazi, nu mitima zeinyu zalame, nu Nne nakite idagano lya milyalya, u bitondo byasililila bya Davidi bitanakuzinda. 4 Lolazi, namukitile mulongeki wane ku baBilongo, nu mwangati nu musondelezia wa bantu. 5 Lebelebe ukamana kilongo kyutamenyine, nu bilongo bitakumenyine byasasie kuguli, ku kabamba ka Yehowa, Kalaga wobe nu Wasililila wa Israeli, kubuno akulebizie na lutanuno lwage.
6 Londazi Yehowa nkungu zanamoneka! Mumanazi geikili bwigi! 7 Muntu mubi asige nzila zage, nu muntu uteisanana asige makengelo mage, nu asubye kuli Yehowa; nu We amukwile kyombo, nu asubye kuli Kalaga weitu, nu We amusigilile bwagi nunsania.
8 Yehowa atenda bunee: “Makengelo mane ta makengelo meinyu, aba nzila zane ta nzila zeinyu. 9 Kubuno anga bwasakama igulu nunsania kutinga kisi, u bubo nzila zane zasakama nunsania kutinga nzila zeinyu, nu makengelo mane matinga makengelo meinyu.
10 Kubuno anga bukuloka mbula nu lubula kutuka kwigulu, nu tazikusubya ko lingo, tondo zikununia nsi nu kwasia biyikanwa nu kubinagya kukasa idia ku muyiki wa mbuto nu mulizi, 11 ububo bukaba idagi lyane, likutuka ku kanua kane; talikasubya bulia, tondo lyazindilizie bunkutunda nu kuzindilizia makengelo mane. 12 Mukatuka ku mbogimbogi, nu mukasondelezibwa mu bubobelelo; lwabusio lweinyu miduko nu tukililo zikeimba, nu miti insania za kisi zikatuta nkasa. 13 Ga kiziki kya mikele miti za shindano zikasa, nu ga kiziki kya mingilingili gekasa misenia; bubo bukaba lukumu lwa Yehowa, nu kalolesio kage ka milyalya takakazikibwa.”