Idagano ito.
54
1 Uwe uli mugumba, uwe utabutile, imba! Laluka n'iyuki lyobe ku kwimba, laluka na mbogimbogi; uwe uteli na lubaba lwa kubuta; kubuno bana ba mukikulu kigilwa beli beingi kutinga bana ba wozo kilanga kili na wamulume; Yehowa atenda bubo. 2 Tanuna ku numba zobe za hema, nu lambula mapazia ma kiziki kyobe kya kwikala, ntube mukuku; talikila bulazi bwa mizigi zobe, lindia mango ma numba zobe za hema. 3 Kubuno wakuke ku lulenge lwa kwidume nu ku lulenge lwa kwikazi; nu kibuti kyobe kyapiene baBilongo; nu bakite miino zasigede makindu kuba mu bantu. 4 Ntukue boba; kubuno ntwakue na nsoni; aba ntuzangezange, kubuno ntwakue na nsoni; wibilile nsoni za bukinga bwobe, nu ntukengele lingo nsoni za busigala bwobe. 5 Kubuno Mubumbi wobe eli iba wobe; Yehowa, Mwiya Mayombo u izina lyage; nu Wasililila wa Israeli eli Mukuluzi wobe. We akumanwa Kalaga wa kisi kinsania. 6 Kubuno Yehowa akumanine anga mukikulu wasigwa nu kwinibwa mutima, anga mukikulu wamenkilwe mu nkungu za bukinga bwage. Kalaga wobe atenda bubo. 7 Ku nkungu nkeke nakusigile tondo ku kyombo kyingi nakusubizie. 8 Ku bongoa bukali bwitila nabisile malanga mane kuguli ku nkungu emozi; tondo ku kyombo kya milyalya nkakusigilila, Yehowa, Mukuluzi wobe, atenda.
9 Kubuno kitondo kikino kiseli kundi anga mazi ma Noa; buno buli bulingilingi na bunalumbide buno mazi ma Noa tamakakukila lingo kisi; ububo bunalumbide buno nsikaba na bongoa kuguli, aba kukuzugila lingo. 10 Aba ndi miduko zikatukibwa, nu tukililo tukatengatenga, tondo kyombo kyane takikatuka kuguli, aba idagano lyane lya bubobelelo talikatuka; ububo bwatenda Yehowa.
11 Uwe mwino wasungizibwe, nu wekilwe na kisoa, nu kutabobelezibwa, lola nabike makozi ma zumaridi z'idangi isoga kuguli, nu nabike bibanza byobe gantata yakuti z'idangi ly'igulu. 12 Nu Nne nakite byindo byobe na makozi ma akiki, nu nibi zobe za alimasi, nu ntungo zobe insania makozi ma bukunza bukali. 13 Nu bana bobe beigisibwe na Yehowa, nu bubobelelo bwa bana bobe bwabe bwingi. 14 Wimikwe mu bulili, nu ntwabengwe. Kubuno ntwakue kampa boba, nu boba bwabe bulazi nobe, nu boba bukali tabwabase. 15 Lola, bakundamane nunse, tondo ta ku lwango lwane; bansania bakukalile lwango bazike ku kabamba kobe. 16 Lola, Nne u wabumbile mutumbi ukuguba muguba, nu kutula masumo ku mulimo wamo; nu Nne nabumbile mwiti ku kabamba ka kwita. 17 Masumo mansania matulilwe ku kabamba kobe tamakite bwampa; nu ndami insania zikukusongela, wazisungie. Bubuno u bupieni bwa bakiti ba Yehowa, nu bulili bwabo bukutuka kundi; Yehowa abutenda.