53
1 Nazi wakatizizie misagu zeitu? Nu kuboko kwa Yehowa kwalolesizibwe ku nazi? 2 Kubuno akaba lwabusio lwa Yehowa anga kiyikanwa kyasa busoga, nu anga isina mu kisi kyakama; we nteli na kilungi aba busoga bwa kulola, nu mu nkungu zitwamumoneko nteli mbangilwa aba tumutunde. 3 Abengilwe nu kusombwa na bantu, muntu wa kabebe, nu wizi mbabazio, nu anga muntu u bakubisa malanga mabo; abengilwe nu tatwamuganzile kuba kena. 4 Bulili, ekile mbabazio zeitu nu ekile tubebe tweitu; tondo twamonine kwakulibulwa, akusungibwa na Kalaga, nu kwinibwa mutima. 5 Tondo ababazizibwe ku kabamba ka bwagi bweitu, abede na byulu ku kabamba ka mibi zeitu. Lusungio lwa kulusia bubobelelo bweitu lwabede gantata gage, nu ku kulibulwa kwage beiswe tonine. 6 Beiswe bansania anga mikoko twaziminne; twagalukile na muntu na muntu ku nzila zage wenyene; nu Yehowa abikile bwagi bwa beiswe bansania gantata gage.
7 Abengilwe nu asungizibwe, tondo ntalimbwide kanua kage; anga kyana kya mukoko kyekwa kwenda kuseswa, nu anga mukoko wungwilila lwabusio lwa bakusesa myoza zage ntalimbwide kanua kage. 8 Bamutikizye, mu kumubenga nu kumusungia. Nu ku ba kikyo kibuti, nazi wakengede buno asombwa mu kisi kya beli na kalamo, nu buno alibwidwe ku kabamba ka bwagi bwa bantu bane? 9 Bamumbide nsinda gamozi na bagi; nu gamozi na bagumi mu lukuo lwage; aba we ntakitile kabenga, aba kitondo kya bwengelezi takyatukile nunse mu kanua kage.
10 Aba bubo bwatananizizie Yehowa kumusungia nunsania nu kumubabazia nkungu zakakasana kalamo kage kuba kisansa ku bwagi amone kibuti kyage, atalikile bindi byage, nu kusombola kwa Yehowa kwatalikilwe mu maboko mage. 11 Kumbusa kwa kumona lusungio mu kalamo kage, we amone kyengi kya kalamo nu abobelele; ku menge mage mukiti wane wisanana, akite beingi kuba beiya bulili; nu we eeke mibi zabo. 12 Ku kabamba kako nkamubeganizia kyindi gamozi na banene, nu we akabegania byanyagwa ku bita gamozi na beli na magala; kubuno akasenne kalamo kage aaba nu kukua, nu aganzilwe gamozi na babo beiya mibi, kubuno ekile bwagi bwa bantu beingi, nu kusegela bagi.